Дорноговь аймгийн ЗДТГ-ын Цэргийн хэлтсийн дарга, хурандаа Л.Баатартай цөөн хором ярилцлаа.

-Жил бүр орон даяар цэрэг татлагын үйл ажиллагаа өрнөдөг. Энэ жилийн цэрэг татлагын онцлог юу байв?

-Дорноговь аймгийн цэргийн штаб Дорноговь аймгийн Засаг даргын Тамгын газрын бүрэлдэхүүнд багтаж, үйл ажиллагаагаа явуулж байна. Манай байгууллагын гол онцлог гэвэл орон нутагт  батлан хамгаалах хууль тогтоомжийг хэрэгжүүлэх, аймгийн Засаг дарга болон БХЯ-ны сайдын хооронд байгуулсан үр дүнгийн гэрээг хэрэгжүүлж ажиллах үндсэн чиг үүрэгтэй. Дээрх үүргүүдийн нэг нь ард иргэдэд батлан хамгаалах хууль тогтоомжийг сурталчилах, иргэдэд цэрэг эх оронч хүмүүжил олгох зэрэг олон талт үйл ажиллагаа юм. Мөн цэрэг татлагатай холбогдуулан цэргийн тоо бүртгэлийг хөтлөх, дайчилгааны сургалт, бэлтгэлийг зохион байгуулах, цэрэг халалт, таталт гэх мэтчилэн үндсэн үйл ажиллагаагаа явуулж байна. 2017 оны гуравдугаар сард Монгол цэргийн өдрөөр Зэвсэгт хүчний 94 жилийн ойн баяр тохиосон. Энэ  хүрээнд аймгийн Засаг даргын захирамжаар 15 ажлыг зохион байгуулахаар төлөвлөсөн. Тухайлбал, Дорноговь аймагт бэлтгэл болон чөлөөнд байгаа үндэсний аюулгүй байдлыг хангасан тусгайлсан чиг үүрэг бүхий байгууллага, цэргийн тэтгэвэрт гарсан хүмүүсийн “Мөнхийн мөрдөстэй залуу нас” сэдэвт ажлыг аймгийнхаа Ахмадын хороотой хамтарч зохион байгууллаа. Уг үйл ажиллагаанд 110 орчим ахмад настан оролцсон. Энэ хүмүүсийн хичээл зүтгэлийг үнэлж шагнаж, урамшуулсан. Мөн Дорноговь аймгийн ЗДТГ-тай хамтарч 18 нас хүрсэн залуучуудад цэргийн үүрэгтний үнэмлэхийг гардуулах ажлыг зохион байгуулсан. Энэ үйл ажиллагаанд 40 орчим залуус оролцлоо. Уг үйл ажиллагааны үеэр Замын-Үүд сумын Хилийн 014 дүгээр ангид алба хааж байгаа цэргүүд ая дууны мэндчилгээ хүргэсэн. Зэсвэгт хүчний 94 жилийн ойтой холбогдуулан үндэсний аюулгүй байдлыг хангах тусгайлсан үүрэг үүрэг бүхий байгууллагуудын дунд болдог “Марш тактикийн тэмцээн”-ийг зохион байгууллаа. Тус үйл ажиллагаатай уялдуулан үндэсний аюулгүй байдлыг хангах тусгайлсан үүрэг үүрэг бүхий байгууллагуудын дунд орон нутагт болзошгүй аюул занал тохиолдсон үед хэрхэн ажиллах талаар команд штабын нэгдсэн дадлага, сургуулилтыг хийсэн. Дадлага, сургуулилтаар бүх байгууллага үндсэн чиг үүргээсээ гадна болзошгүй үймээн, самуун үүссэн үед хэрхэн хамтарч ажиллах талаар нэг ойлголцолд хүрсэн үр дүнтэй үйл ажиллагаа болсон.

-Нэг үе цэрэгт алба хаахаар ирсэн залуус бичиг үсэг тайлагдаагүй байдаг байлаа. Сүүлийн үед төрийн албанд зүтгэх сонирхолтой залуус алба хаахыг хүсэх болсон. Энэ жил хугацаат цэргийн алба хаахаар ирсэн залуусын боловсрол, мэдлэг ямар байна вэ?

-Батлан хамгаалах яамнаас батлан хамгаалах үйл ажиллагааг сурталчлах талаар орон нутагт олон ажил зохион байгуулж байна. ЕБС-ийн ахлах ангийнхны дунд спортын “Дөл” тоглолтыг зохион байгуулдаг. Энэ жил манай аймгийн ахлах 12 сургуулийн найман баг оролцсон. Тус тэмцээнд Зүүнбаян сумын сургуулийн ахлах ангийн сурагчид тэргүүн байр эзэлсэн. Эндээс харахад, цэрэг, эх оронч үзлийг залуучуудад суулгах хандлага өөрчлөгдөж байна. Ялангуяа төрийн албанд цэргийн алба хаасан хүмүүсийг ажилд авахтай холбогдуулан залуучууд цэрэгт явах болсон. Ер нь залуучуудын ихэнх нь цэргийн алба хааж өөрийгөө сорих, эх орноо батлан хамгаалах хандлагатай болсон байна.

-Цэрэг татлагыг ихэвчлэн хаанаас татав. Орон нутаг эдийн засгийн үр ашгаа бодоод ойролцоох аймгуудаас татдаг уу. Энэ талаар салбар яамнаас ямар бодлого барьдаг юм бэ?

-Дорноговь аймаг цэрэг татлагын ажлыг хоёр бүсчлэлд явуулдаг. Энэ жил Даланжаргалан, Ихэт, Дэлгэрэх, Алтан ширээт, Замын-Үүд зэрэг сумын залуучуудын дунд цэрэг татлага зохион байгуулсан. Цэргийн албанд татагдаж байгаа 18-26 насны залуучуудыг эрүүл мэндийн үзлэгт  хамруулдаг. Үүнээс хархад дотор, мэдрэлийн чиглэлийн өвчлөл залуучуудын дунд өндөр байна. Бид эрүүл мэндээ сайжруулах талаар үнэтэй зөвлөгөө өгдөг.