Өнөөдөр Хан-Уул дүүргийн Онцгой комиссын Ой хээрийн түймэртэй тэмцэх шуурхай ажлын хэсэг хуралдлаа. Хурлыг дүүргийн засаг даргын нэгдүгээр орлогч дарга бөгөөд Онцгой комиссын орлогч дарга Г.Батсайхан удирдан явуулж дүүргийн нутаг дэвсгэрт гарсан ой хээрийн түймрийн нөхцөл байдлын талаар Онцгой байдлын хэлтсийн дарга хурандаа Д.Даваасүрэн танилцууллаа.

Ажлын хэсгийн есөн гишүүний санал дүгнэлтийг авч дүүргийн Засаг даргын захирамжаар дараах ажлыг зохион байгуулахаар боллоо.  Тодруулбал, долдугаар сарын 11 өдрийг хүртэл ногоон бүсэд зорчих, аялал зугаалга зохион байгуулах хөдөлгөөнийг түр хязгаарлах, шаардлагатай тохиолдолд хэлтэс албад, аж ахуйн нэгж байгууллагаас хүн хүч ажиллуулж ой хээрийн түймрийг хугацаа алдалгүй унтраах арга хэмжээг авч ажиллах үүрэг өглөө. Одоогоор нийслэлд 6 газар түймэртэй байгаа аж.

Тиймээс нийслэлийн ногоон бүсэд хуурайшилт зэрэг өндөр байгаа энэ үед иргэд олон нийтийг ногоон бүсэд шаардлагагүй бол зорчихгүй байх, галын аюулгүй байдлаа хангаж, ил задгай гал гаргахгүй байхыг нийслэлийн Онцгой байдлын газраас мөн онцгойлон сэрэмжлүүлж байна.