Дархан-Уул аймгийн эдийн засаг, нийгмийг 2017 онд хөгжүүлэх зорилт болон үйлдвэржилт, дэд бүтцийн чиглэлээр зарласан төсөл хөтөлбөрт нийт 140 төсөл ирснээс төслийн журам, шаардлагыг хангасан 189.3 сая төгрөгийн 37 төслийг дэмжиж батламжийг нь /2017.06.13/ гардуулж санхүүжилтийг олгосон.

Энэхүү төслийн нэг нь аймгийн Онцгой байдлын газраас хэрэгжүүлж байгаа “Иргэдийг гамшгаас хамгаалах, мэдлэг, дадлага олгох” сургалтын цогцолбор байгууламжийн барилгын ажил юм. Тэгвэл өчигдөр тус барилгын ажил дуусч, албан ёсоор нээлтээ хийлээ.

Монгол улсдаа анх удаа баригдаж байгаа тус төв нь цутгамал бетон суурь, карказ дүүргэлтийн блокон хана цутгамал бетон дээвэртэй сургалтын зориулалтын барилга ажээ. Тус барилга нь гал түймэр унтраах, аврах 22 дугаар ангийн шинээр баригдаж байгаа депогийн ар талын талбайд байгуулагдаж байгаа аж.

Тус цогцолбор нь дөрвөн давхар барилгын стандартаар баригдаж байгаа бөгөөд утааны камер, газар хөдлөлтийн гамшгийн үед барилгаас нуугдах, хүлээх гарах аргад суралцах, аврах дэр ашиглан аврах ажиллагааг зохион байгуулан буулгах, аврах хоолой ашиглан авралтын үйл ажиллагаа явуулах гэсэн дөрвөн үндсэн хэсгээс бүрджээ.

Энэхүү төв нь ашиглалтад орсноор та бидний ирээдүй болсон үр хүүхдүүд оюутан сурагчид, гамшгаас хамгаалах мэргэжлийн албад, мэргэжлийн ангиудын бие бүрэлдэхүүнийг гамшгаас хамгаалах чадвар мэргэжлийг бататгаж дадал хэвшил болгох ач холбогдолтой юм. Мөн байгууламжийн гадна хойд ханыг ашиглан ханан хад буюу уулнуруу байгалийн хүндрүүлсэн нөхцөлд аврах баг ажиллах дадлага сургууль хийх зориулалттай авиралтын ханан хад төлөвлөгджээ.