ОХУ-аас Суданд суух Онц бөгөөд бүрэн эрхт Элчин сайд Миргаяс Ширинский тус улсын нийслэл Хартум хот дахь гэрийнхээ усан сангаас нас барсан байдалтай олджээ. Энэ талаар Судан болон ОХУ-ын албаны эх сурвалжууд хэвлэлд мэдээллээ.

Суданы Гадаад хэргийн яамны мэдэгдэлд “ОХУ-ын Элчин сайд өнөө шөнө Хароум хот дахь гэртээ нас барсан” гэж дурьдсан байна. Одоогоор үхлийн шалтгаан тодорхойгүй байгаа аж.  Орон нутгийн цагдаагийн газраас “Франц пресс” агентлагт Элчин сайдын цогцсыг өчигдөр орой 19.05 цагт гэрийнх нь усан сангаас олсон гэж мэдэгдсэн байна.

Харин ОХУ-ын Гадаад хэргийн яамны мэдэгдэлд “чухам ямар шалтгааны улмаас Элчин сайд М. Ширинский амьсгал хураасан болохыг бид удахгүй судалж мэдсэнийхээ дараа олон нийтэд мэдээлэх болно” гэжээ.

Гэхдээ Элчин сайдын яамны ажилтны ярьж буйгаар  талийгаач зүрхний шигдээс өвчнөөр таалал төгссөн байж магадгүй аж. Судан дахь Элчин сайдын яамны олон нийттэй харилцах хэлтсийн ажилтан Сергей Коняшин “Талийгаачийн усан сандаа амьсгал хураасан байхыг олж харсныхаа дараа шууд түргэн тусламж дуудсан. Гэвч, амийг нь аварч чадсангүй. Ерөнхийдөө сүүлийн өдрүүдэд зүрх нь өвдсөнөөс болж, нойргүйдэх шинж тэмдэг илэрч байсан” хэмээн “RT” агентлагт ярьсан байна. Дипломатчийн цогцос эдүгээ Хартум хотын моргт хадгалагдаж байгаа аж. Улмаар хууль журмын дагуу ОХУ руу цогцсыг тээвэрлэж, түүнийхээ дараа оршуулгын ёслолын зохион байгуулах юм байна.

Эдүгээ ОХУ-ын хэвлэлд Элчин сайдын эмгэнэлийн мэдээлэл урсаж байгаа юм.  М.Ширинскийн ар гэрийнхэн, Оросын ард түмэн болон засгийн газарт Суданы Гадаад хэргийн яамнаас эмгэнэл илэрхийлсэн байна.

М.Ширинский 1977 оноос хойш дипломат албан тушаалыг хашиж иржээ. Тэрээр 1990-ээд оны эхээр Йеменд суух ОХУ-ын Элчин сайдын зөвлөх, Саудын Арабын Жеддах дахь ерөнхий консулаар тус тус ажиллаж байсан байна. Мөн 2006-2013 онд Зүүн Африкийн Рвандад Элчин сайдаар сууж байгаад 2013 оны арванхоёрдугаар сараас Судан дахь Элчин сайдаар томилогджээ. Тэрээр тус улсад  очсоноосоо хойш ОХУ болон Суданы харилцааг бэхжүүлэхэд ихээхэн хүчин чармайлт гаргасан байна. Хамгийн сүүлийн жишээ дурьдахад, энэ онд Суданы Ерөнхийлөгч ОХУ-д өндөр төвшний айлчлал хийхээр бэлтгэж байжээ.

Энэ он гарсаар ОХУ-ын хэд хэдэн Элчин сайд зуурдаар таалал төгсөөд байгаа юм. Зургаан сарын өмнө АНУ-д олон жил Элчин сайдаар ажилласан Витали Чуркин 64 насандаа зуурдаар таалал төгссөн юм. Мөн өнгөрөгч нэгдүгээр сард Энэтхэгт суух ОХУ-ын Элчин сайд Александр Кадакин 68 насандаа өвчний улмаас таалал төгссөн бол 2016 оны арванхоёрдугаар сард Туркид суух Элчин сайд нь ч гэмт этгээдэд буудуулж нас барсан билээ.