“Монголын мэдээ” сонин хоёр хөршийн болоод дэлхийн томоохон хэвлэл Монгол Улсын талаар хэрхэн мэдээлж буйг “Монгол дэлхийн хэвлэлд” булангаараа орчуулан хүргэдэг билээ. Энэ удаад Монгол Улсын Ерөнхийлөгч Х.Баттулга, ОХУ-ын Ерөнхийлөгч В.Путин нарын Унгарын Будапешт хотод болсон уулзалтын талаар Оросын ТАСС агентлаг хэрхэн мэдээлснийг орчуулан хүргэж байна. Мөн “Синхуа”, “Ройтерс” агентлагт Монголын улс төрийн өнөөгийн нөхцөл байдлын талаар хэрхэн нийтэлснийг уншигчиддаа сонирхуулахаар бэлтгэлээ. 

 

ТАСС: Х.Баттулгад  В.Путин баяр хүргэлээ

 

Унгарын нийслэл Будапешт хотноо эхэлсэн Жүдо бөхийн насанд хүрэгчдийн дэлхийн аварга шалгаруулах тэмцээний үеэр Монгол Улсын Ерөнхийлөгч Х.Баттулга ОХУ-ын төрийн тэргүүн В.Путинтай уулзсан. Тэрбээр Ерөнхийлөгчийн сонгуульд ялалт байгуулснаасаа хойш анх удаагаа хойд хөршийн тэргүүнтэй уулзсан нь энэ байсан юм.

 

Тэгвэл тус уулзалтын талаар Оросын “ТАСС” агентлагийн цахим хуудаст “ОХУ, Монголын төрийн тэргүүнүүд Дорнын эдийн засгийн чуулганы үеэр дахин уулзахаар боллоо” гэсэн гарчиг бүхий мэдээлэл нийтлэгджээ.  Үүнд “ОХУ-ын Ерөнхийлөгч Владимир Путин, Монгол Улсын Ерөнхийлөгч Х.Баттулга нар ирэх сард Владивосток хотноо болох дэлхийн эдийн засгийн чуулга уулзалтын үеэр хоёр талын яриа хэлэлцээр хийхээр тохиролцлоо.  Даваа гарагт болсон уулзалтын үеэр В.Путин  жүдо бөхийн ДАШТ-д Монголын тамирчид амжилттай оролцож байгаатай холбогдуулан Х.Баттулгад  баяр хүргэсэн юм. Тэрбээр  “Би тантай биечлэн уулзаж байгаадаа баяртай байна. Бид бүхэн таныг улс төрч бөгөөд сайн тамирчин гэдгээр чинь сайн мэднэ. Монголын жүдочид ДАШТ-д амжилттай оролцож байна. Танд баяр хүргэе” гэв. 

 

Тэрбээр мөн Владивостокт болох эдийн засгийн чуулга уулзалтын үеэр Х.Баттулгатай уулзаж, хоёр улсын харилцааны талаар илүү дэлгэрэнгүй яриа өрнүүлэхээр төлөвлөж буйгаа дуулгажээ. В.Путин ОХУ-Монголын худалдаа энэ онд нэлээд ахицтай байгааг дурьдаад, “Өнгөрсөн онд 20 хувиар буурсан үзүүлэлттэй гарсан худалдааны эргэлт зөвхөн  2017 оны 1-6 сард 34 хувийн өсөлттэй үзүүлэлттэй байна” гэлээ. Мөн хоёр талын эдийн засаг болон соёлын харилцааг улс төрийн харилцааны адил илүү өндөр төвшинд гаргахад анхаарлаа хандуулахыг Монгол Улсын Ерөнхийлөгч Х.Баттулгад  ОХУ-ын Ерөнхийлөгч В.Путин уриаллаа.

 

Тухайлбал, Орос-Монголын хамтарсан үйлдвэр, компаниудын үйл ажиллагааг идэвхжүүлж, Орос-Монголын хил дамнасан ачаа тээврийн тоо хэмжээг нэмэгдүүлэх хэрэгтэй байна гэж В.Путин онцлон тэмдэглэв. Үүний хариуд Х.Баттулга ч жүдо бөхийн дэлхийн аварга шалгаруулах тэмцээний үеэр В.Путинтай уулзаж буйдаа баяртай байгаагаа илэрхийлэхийн сацуу “Бид хоёрын хэн хэн нь энэ спортыг сонирхдог, энэ спортод хайртай учраас ийм арга хэмжээний үеэр уулзах хувьтай байжээ. Бидний энэ сонирхол цаашдын хамтын ажиллагаанд нөлөөлөх нь дамжиггүй” хэмээлээ. 

 

Мөн тэрбээр В.Путины саналыг дэмжиж,  Владивостокт илүү дэлгэрэнгүй яриа хэлэлцээр өрнүүлэхээ илэрхийлэхийн ялдамд, хоёр талын худалдааг өргөжүүлэх бодолтой байгаагаа дурьдлаа. Х.Баттулга “Би одоогийн бодит байдлыг харгалзан үзсэний үндсэн дээр хойд хөрштэйгөө харилцаагаа улам бүр бэхжүүлэхийг эрмэлзэж байна” гэв. 

 

Тэрбээр цааш нь худалдааны эргэлт өссөн нь  хил дамнасан худалдаа өссөнтэй холбоотой гээд, 4000 гаруй км урттай Орос-Монголын хил дамнасан хамтын ажиллагааг бэхжүүлэхэд гол анхаарлаа хандуулах хэрэгтэй байгааг уриалсан юм. Түүнчлэн, Х.Баттулга хөрөнгө оруулалтад онцгой анхаарал хандуулахаа мэдэгдэж, Монгол-Оросын хамтарсан “Улаанбаатар төмөр зам” ХНН-ийг дурьжээ. В.Путин ч түүний саналыг зөвшөөрч буйгаа илэрхийллээ. ОХУ-ын Владивосток хотод ирэх есдүгээр сарын 6, 7-нд дэлхийн эдийн засгийн гуравдугаар чуулга уулзалт зохион байгуулагдах юм. 

 

Xinhua: Ж.Эрдэнэбатыг огцруулах  асуудлыг 15 хоногийн дотор шийдвэрлэх учиртай

 

БНХАУ-ын төрийн мэдлийн “Синхуа” агентлагийн цахим хуудаст Монгол Улсын Ерөнхий сайд Ж.Эрдэнэбатыг огцруулах тухай шаардлагыг эрх баригч намын гишүүд гаргасан тухай мэдээлэл нийтлэгдсэн байна. Тус мэдээллийг эх хэлнээ хөрвүүлбэл, “Монголын эрх баригч МАН-ын 30 гишүүн Ерөнхий сайд Жаргалтулгын Эрдэнэбатыг огцруулахад нэгдэн гарын үсгээ зуржээ. Улмаар огцруулах шаардлагаа УИХ-ын дарга М.Энхболд эзгүй байсан тул УИХ-ын дэд дарга Я.Санжмятавд гардуулан өгсөн байна. 

 

МАН УИХ-д 65 суудалтай.  Гэвч, Ерөнхий сайд Ж.Эрдэнэбатыг концессын гэрээ, хүүхдийн тэтгэмж, уул уурхайн компаниудын хувьцаа гэх мэт эдийн засгийн гол түлхүүр болсон хууль тогтоомжийг зөрчсөн хэмээн тэдгээр гишүүд  буруутгаж байгаа юм байна. “Түүний гаргаж буй шийдвэр, үйл ажиллагаа нь хэдхэн бүлэглэлийн эрх ашигт нийцэж байна” гэж УИХ-ын гишүүн Т.Аюурсайхан хэллээ.  Монгол Улсын хуульд зааснаар Ж.Эрдэнэбатыг огцруулах тухай  асуудлыг 15 хоногийн дотор хэлэлцэн, шийдвэрлэх учиртай юм. Эдүгээ 44 настай МАН-ын гишүүн Ж.Эрдэнэбат 2016 оны долдугаар сард Ерөнхий сайдаар томилогдсон юм. 

 

Дашрамд дурьдахад, Шадар сайд У.Хүрэлсүх албан тушаалаасаа огцрох хүсэлтээ Эрдэнэбатад хүргүүлсэн удаатай. Тэрбээр огцрох хүсэлтдээ өнөөгийн Ерөнхий сайд Ж.Эрдэнэбатын бодлого, үйл ажиллагаа нь үндэсний эрх ашигт нийцэхгүй байгаа тул хамтарч ажиллаж чадахгүй гэдгээ дурьджээ” гэсэн байна.  

 

Reuters: 2004 оноос хойш нэг ч Ерөнхий сайд бүрэн эрхийнхээ хугацааг дуусгаагүй

 

ОХУ-ын “Ройтерс” агентлагийн сэтгүүлч Терренс Эдвард  манай улсын улс төрийн ертөнцөд үүсээд буй Засгийн газар огцруулах эсэх талаарх дуулиан шуугианы талаар нийтлэл бичжээ. Түүнд “Монголын зарим хууль тогтоогчид Ерөнхийлөгчийн сонгуульд нам нь ялагдал хүлээсэнтэй холбоотойгоор Ерөнхий сайд Ж.Эрдэнэбатыг албан тушаалаасаа огцрохыг шаардлаа. Эрх баригч МАН-ын гишүүн Т.Аюурсайхан УИХ-ын 76 гишүүний 30 нь Эрдэнэбатын Засгийн газрыг огцруулахыг дэмжин гарын үсэг зурсан талаар твиттер сүлжээндээ нийтэлжээ. Мөн тус мэдэгдлээ бусад нийгмийн сүлжээнд хуулбарлан нийтэлсэн байв. 

 

Одоогоор Ерөнхий сайдын ажлын албанаас тус огцруулах бичигтэй холбоотойгоор ямар нэг тайлбар хийгээгүй байгаа юм. МАН 2016 оны парламентын сонгуулиар УИХ-ын 76 суудлын 65-д нь ялалт байгуулсан. Гэвч, өнгөрсөн сард болсон Ерөнхийлөгчийн сонгуулийн хоёр дахь шатны санал хураалтад МАН-аас нэр дэвшсэн УИХ-ын дарга М.Энхболд сөрөг хүчний нэр дэвшигч  самбо бөхийн тамирчин асан, бизнесмэн Х.Баттулгад  ялагдсан юм. Энэ ялагдал МАН-ын Засгийн газрын хатуу бодлого, авлигын дуулианд ард түмний өгсөн дүн гэж харагдаж буй. Монголын парламентын засаглалын дагуу Ерөнхий сайд Засгийн газрыг тэргүүлэх бол Ерөнхийлөгч хууль санаачлах, хориг тавих зэрэг хязгаарлагдмал эрхтэй байдаг.  

 

1990 онд хуучин Зөвлөлт холбоот улсын хараат байдлаас гарч, ардчилсан тогтолцоонд шилжсэн Монгол улсад Засгийн газар солигдох нь бараг нийтлэг үзэгдэл болж хувираад байна. 

 

Тодруулбал, 2004 оноос хойш нэг ч Ерөнхий сайд бүрэн эрхийнхээ дөрвөн жилийн хугацааг дуусгаж байгаагүй юм. Энэ жил нүүрсний үнэ өндөр байгаа нь Монгол Улсын эдийн засгийг хурдацтай өсөхөд хүргэсэн. Гэвч энэ оны эхээр, гадаадын хөрөнгө оруулалт буурч, түүхий эдийн үнэ унасантай холбоотойгоор Монгол Улс Олон улсын валютын сангаас санхүүгийн хямралыг хөнгөвчлөх, хөрөнгө оруулагчдын итгэлийг сэргээхэд чиглэсэн 5.5 тэрбум ам.долларын хөнгөлөлттэй зээл олгох хүсэлт гаргасан юм” гэжээ.