Хөрөнгө оруулагчдын эрх ашгийг хамгаалах, тэднийг хууль эрхзүйн орчноор хамгаалах, хөрөнгө оруулах таатай орчин нөхцлийг бий болгох, гадны хөрөнгө оруулалтыг нэмэгдүүлэх зорилгоор Засгийн газар болон “Фронтиер” үнэт цаасны компанитай хамтран зохион байгуулж буй “Инвест Монголиа” чуулга уулзалт өнөөдөр Шангрилла зочид буудалд зохион байгуулагдаж байна.

Чуулга уулзалтыг нээж Монгол Улсын Ерөнхий сайд Ж.Эрдэнэбат болон ЗГХЭГ-ын дарга Ж.Мөнхбат нар үг хэллээ. “Инвест Монголиа” хурлын үеэр хөрөнгө оруулагчдын анхаарлын төвд байгаа “Оюутолгой”, “Тавантолгой” төсөл, Монгол улсын гадаадын хөрөнгө оруулалт, эдийн засгийн байдлын талаарх сүүлийн үеийн мэдээллүүдийг өгөхөөр төлөвлөжээ. Ерөнхий сайд Ж.Эрдэнэбат хэлсэн үгэндээ “Бид улсын төсвийн хөрөнгө оруулалтаар чамгүй олон бүтээн байгуулалтыг хийгээд байна. Аймгийн төвүүдийг хатуу хучилттай автозамаар холбох ажил амжилттай явагдаж байгаа.

Экспортын чухал ач холбогдолтой дэд бүтцийн ажлуудыг ч олон хийж байна. Тухайлбал, түүхий эдийн экспортын 30 гаруй хувийг тээвэрлэдэг Гашуунсухайт чиглэлийн дэд бүтцийг сайжруулахад хөрөнгө оруулалт чухал байгаа. Өөрөөр хэлбэл, Монгол Улсын баялгийг зөвхөн олборлох бус түүнийг тээвэрлэх, боловсруулах, эцсийн бүтээгдэхүүн болгоход хөрөнгө оруулалт хэрэгтэй байгаа юм. Энэ салбарт хамтарч ажиллахад нээлттэй боломж их бий” гэв.

Харин Ж.Мөнхбат сайд Ерөнхий сайдын захирамжаар хөрөнгө оруулагчид аж ахуй эрхлэгчдийг төрийн захиргаа болон хуулийн байгууллагынхан хууль бусаар тагнаж чагнасан, мөрдөж мөшгисөн, дарамт учруулсан, хүнд суртал гаргаж эрх ашгийг нь хохироосон эсэхийг шалгах ажлын хэсэг байгуулагдаж энэ талаар дүнгээ гаргасныг танилцуулав.

Ажлын хэсгийн шалгалтын хүрээнд ёсзүйн болон хүнд суртал гаргасан, үндэслэлгүйгээр дарамт учруулсан гэх гомдол 2014 оноос 2016 оны есдүгээр сар хүртэлх хугацаанд 39631 гарчээ. 188 өргөдөл гомдолд зөрчил илэрснийг хариуцлага тооцож, мөн 24 албан хаагчид сахилгын хариуцлага ногдуулжээ. Эдгээр өргөдөл гомдлын дийлэнх нь үндэслэлтэй байсан гэдгийг Ж.Мөнхбат сайд онцоллоо. Түүнчлэн бизнес эрхлэгч гадаад дотоодын 319 иргэнд хилийн хориг тогтоосон байсныг цуцалжээ.