Сургуулийн өмнөх боловсрол, ерөнхий боловсролын сургуулийн төрийн өмчийн сургуулийн багш нарын цалингийн доод хэмжээг 1.6 сая төгрөг болгон нэмэгдүүлэх зорилгоор түр хороог байгуулсан.  Түр хороонд эдүгээ монгол орон даяарх аймаг,  сумын 30 гаруй мянган багш нэгдээд байгаа аж. Тэгвэл тус түр хороо байгуулагдсанаасаа хойш яг нэг сарын дараа хэвлэлийн бага хурал зохион байгуулж, өнгөрсөн хугацаанд гарсан ахиц хийгээд цаашдын хэрэгжүүлэх алхмынхаа талаар мэдээлсэн юм.

Хэвлэлийн хуралд, Багшийн цалинг нэмэгдүүлэх түр хорооны Ерөнхий зохицуулагч Ц.Мөнхтуяа, Орхон аймгийн нэгдүгээр сургуулийн түүх, нийгмийн ухааны багш н.Отгонжаргал, Говь-Алтай аймгийн гуравдугаар сургуулийн технологийн багш Ж.Энхбаатар, Завхан аймгийн гуравдугаар сургуулийн гадаад хэлний багш Н.Лхагвасүрэн зэрэг 21 аймаг, сумдын багш нарын төлөөлөл оролцлоо.

Хурлын эхэнд түр хорооны Ерөнхий зохицуулагч Ц.Мөнхтуяа “Монголын бүх багш нараа төлөөлж, 21 аймгийн багш нар өчигдөр Улаанбаатарт ирж, Үйлдвэрчний эвлэлийн хороонд уулзалт хийсэн. Багшийн цалинг нэмэх асуудал Засгийн газрын төвшинд яригдахгүй, шийдэгдэхгүй байгаа учраас бид энэ байдлыг тэвчихгүй, эсэргүүцнэ. Цалинг нэмэх хүртэл нь тэмцэнэ. Өнгөрсөн сарын 15-нд Засгийн газарт шаардлага хүргүүлсэн. Шаардлагын хариу ирэх ёстой. Тэр хариу ирээгүй тохиолдолд тэмцлийн дараагийн хэлбэр рүү шилжиж, орон даяар  ажил хаяхаар төлөвлөж байна” гэлээ.

Багш нарын цалинг нэмэгдүүлэх түр хороо УИХ-ын 76 гишүүнд хаягласан шаардлагыг хүргүүлсэн бөгөөд нийт багш нартаа хандан “Дэлхийн багш нарын өдрийг тэмдэглэн өнгөрүүлэх хүрээнд аливаа шагнал гардуулах, баярын үйл ажиллагаанаас татгалзаж, цалин нэмэгдүүлэх төлөвлөгөөт үйл ажиллагаанд оролцохыг уриалжээ.

Түүнчлэн, тэдний шаардлагад төр, засгийн зүгээс нааштай хариу ирүүлээгүй тохиолдолд ирэх сарын 5-нд багш нарын онц их хурлыг зохион байгуулах юм байна.