Оюутнууд 3600 төгрөг төлөөд сардаа 44 удаа автобусанд үнэгүй зорчино
“Улаанбаатар смарт карт” ХХК-ийн Үйл ажиллагааны хэлтэс, тээврийн хэсгийн ахлах менежер Ц.Түвшинжаргалаас зарим зүйлийг тодрууллаа.
-Оюутнуудын нийтийн тээврээр үнэгүй зорчих хөнгөлөлттэй картын захиалга болон сунгалтын талаар тодруулаач?
-Сунгалт, шинээр олголтын ажил тухайн их, дээд сургуулиар дамжуулаад хийгдэнэ. Тэгэхээр оюутнууд шинээр карт захиалах болон сунгуулах хүсэлтээ сургуулийнхаа захиргаанд гаргах ёстой. Сунгуулах оюутнуудын тухайд ашиглаж байсан картаа хураалгана. Хураасан картанд нэгдсэн байдлаар сунгалт хийгдэж, оюутнуудад дахин олголт хийгдэх юм. Энэ ажлыг Улаанбаатар смарт карт компани зохион байгуулна. Харин шинээр захиалах гэж буй оюутнууд сургуулийнхаа захиргаанд хандан маягтаа бөглөж, захиална.
-Картын хураамж хэд байх вэ?
-Шинээр захиалах бол 3600 төгрөг. Харин сунгалт хийлгэхэд 1000 төгрөг байгаа.
-Сунгалт 1000 төгрөг гэлээ. Арай үнэтэй биш үү?
-Энэ шийдвэрийг холбогдох байгууллагууд хуралдаж, гарах зардлыг тооцон оюутанд хүндрэлгүй байхаар тооцоолж хийсэн. Ерөнхийдөө автобусанд хоёр удаа зорчих мөнгө шүү дээ.
-Шууд автоматаар сунгах боломжгүй юм уу?
-Автомат цэнэглэлт нь сар бүрийн 1-ний өдөр хийгддэг. Карт дээр нь тухайн картын ашиглах хугацааг сунгаж өгсөн байдаг. Есдүгээр сарын 1-нээс зургадугаар сарын 30 хүртэл. Картын хугацааг сунгахдаа заавал автомат төхөөрөмжид уншуулж байж сунгах шаардлагатай. Автоматаар сэргээх боломжгүй. Сурч байгаад дундаас нь гарсан, чөлөө авсан, төгссөн гэх мэт оюутнууд байдаг учир шууд нэгдсэн байдлаар сунгах боломжгүй.
-Оюутнууд нийтийн тээврээр зорчих хөнгөлөлттэй картаа хэзээ авах вэ?
-Нийтийн тээврээр хөнгөлөлттэй зорчих картын захиалга болон сунгалт хийлгэх хүсэлтийг наймдугаар сарын 31-нээс энэ сарын 6-ны өдрийг дуустал сургуулиуд дээр хүлээн авна. Есдүгээр сарын 12-ны өдрөөс 18-ны өдрүүдэд хөнгөлөлттэй картыг сургуулиудаар нь дамжуулан тараана.
-Нийтийн тээврээр хөнгөлөлттэй зорчих картаа оюутнууд хичээлийн эхний өдрөөс авчихдаг. Энэ жил захиалга яагаад хойшлов?
-Бүх оюутнуудыг хөнгөлөлттэй картын захиалгад хамруулахын тулд наймдугаар сарын 31-ний өдрөөс захиалгыг эхлүүллээ. Өөрөөр хэлбэл, бүх оюутнууд элсэж дууссаны дараа захиалгыг албан ёсоор эхлүүлсэн.
-Оюутнууд нийтийн тээврийн хөнгөлөлттэй картаараа 44 удаа зорчдог. Энэ журамд өөрчлөлт орсон уу. Оюутнууд автобусаар зорчих төлбөрийнхөө 50 хувийг өөрсдөө даана гэсэн мэдээлэл байсан?
-Улсаас оюутнуудын смарт картыг 44 удаа зорчих эрхээр цэнэглэж өгдөг байгаа. Одоогоор энэ журамд өөрчлөгдсөн зүйл байхгүй. Хөнгөлөлттэй зорчиж байгаа оюутны картын нөхөн олговрыг нийслэлийн төсвөөс тээвэрлэсэн аж ахуйн нэгжүүдэд олгодог. Үүний дагуу квотыг ИТХ-аар баталсан журмын дагуу тогтоодог. Одоогоор журамд өөрчлөлт орсон талаархи мэдээлэл манайд ирээгүй байгаа. Өнгөрсөн жилийн батлагдсан журмын дагуу үйл ажиллагаагаа явуулна.
-Картыг хэчнээн оюутанд олгоно гэж тооцоолсон бэ?
-Өнгөрсөн жил их, дээд сургуулийн 57 орчим мянга, МСҮТ, коллежийн 12 мянган орчим оюутанд карт олгогдож байсан. Сургуулиуд төрийн байгууллагаас тогтоосон хяналтын тоонд багтаан шинээр карт авах оюутнуудын мэдээллийг хянаж баталгаажуулан ирүүлснийг үндэслэн их, дээд сургуулиудад нийслэлийн Боловсролын газар, МСҮТ, Коллежуудад нийслэлийн Хөдөлмөрийн газар шинээр олголт хийнэ.
-Энэ жил төгссөн оюутнуудын хувьд автобусны хөнгөлөлттэй картаа дахин ашиглах боломж бий юу?
-Өнгөрсөн жил хөнгөлөлттэй картаар автобусанд зорчиж байгаад сургуулиа төгссөн хүмүүсийн хувьд ашиглаж байсан картаа дахин ашиглах боломжтой. Гэхдээ хөнгөлөлттэй зорчих карт нь энгийн картын горимд шилжсэн. Тиймээс энгийн карттай адил тогтмол цэнэглэн ашиглах боломжтой.
МЭДЭЭНИЙ СЭТГЭГДЭЛ
ХОЛБООТОЙ МЭДЭЭ
Веб сайтад агуулагдсан мэдээлэл зохиогчийн эрхийн хуулиар хамгаалагдсан тул зөвшөөрөлгүй хуулбарлах хориотой.
Copyright © MMINFO.MN All Rights Reserved. Powered by HUREEMEDIA.
