Дэлхийн шилдэг зураг: Газар хөдлөлтийн дараа
Австралийн гэрэл зурагчин Даниэл Берехулак энэ зургийг өнгөрсөн оны дөрөвдүгээр сарын 29-ний өдөр авчээ. Энэ өдрийг сонсмогц уншигч таны санаанд нэгэн аймшигт байгалийн гамшигт үзэгдэл тод буух нь гарцаагүй. Тэр бол Балбын газар хөдлөлт.
Яг энэ өдрөөс дөрөв хоногийн өмнө Балбын нийслэл Катманду хотноо 7.8 магнитудын хүчтэй газар хөдөлж, газар хөдлөлтийн дараах чичиргээн хэд хэдэн удаа мэдрэгдсэн байдаг. Хүн төрөлхтөний түүхэнд хамгийн их хохирол дагуулсан байгалийн гамшигт үзэгдлийн тоог нэгээр нэмсэн энэхүү газар хөдлөлтийн улмаас 8000 гаруй хүн нас барж, 21 мянга гаруй хүн гэмтэж бэртсэнээс гадна үй олон байшин барилга нурж сүйджээ.
Тэр тусмаа орон нутгийн уулын бүсэд орших тосгодууд хамгийн их хохирол амсч байв. Дэлхийн өнцөг булан бүрээс хүмүүнлэгийн ажилтнууд туслахаар ирж байсан ч, алслагдсан тосгодын иргэдэд тусламж хүргэх ажил нэлээд хүндрэлтэй байсан гэдэг. Ямартай ч, энэ газар хөдлөлтөөр Балбын 2.8 сая хүн орон гэргүй болон үлджээ. Тэдгээр орон гэр гэргүй болсон хүмүүсийн нэгхэн төлөөлөл нь зураг дээрх хосууд юм.
Балбын Бхагтапурт газар хөдлөлтийн улмаас нурсан байшингийнхаа цонхоор эхнэр рүүгээ хувин дамжуулж буй нэгэн эр гэрэл зургийн торгон хальснаа ийн буусан байна. Энэ зураг дэлхийн хэвлэлийн шилдэг гэрэл зураг шалгаруулах “World press photo-2016” наадмын Ерөнхий мэдээний төрөлд гутгаар байр эзэлсэн юм.
МЭДЭЭНИЙ СЭТГЭГДЭЛ
ХОЛБООТОЙ МЭДЭЭ
Веб сайтад агуулагдсан мэдээлэл зохиогчийн эрхийн хуулиар хамгаалагдсан тул зөвшөөрөлгүй хуулбарлах хориотой.
Copyright © MMINFO.MN All Rights Reserved. Powered by HUREEMEDIA.
