2018 оны  дэлхийн аварга шалгаруулах тэмцээний урьдчилсан шатны тоглолтууд эхэллээ. Өнгөрсөн шөнө Е хэсгийн гурван тоглолт болж, ганцхан Дани л хожилтой гарч ирлээ.  Данийн шигшээ баг талбайдаа Арменийг хүлээж авч, 1:0-ээр буулгаж авлаа. Тоглолтын хувь заяаг шийдсэн цорын ганц гоолыг 17 дахь минутад Кристиан Эриксен оруулж, багтаа гурван оноо авчирчээ.

Тэгвэл нөгөө талд Казахстан талбайдаа Польшийн хүчирхэг шигшээг хүлээж авч, 2:2-оор тэнцлээ. Ингэснээр хоёр баг Данийн араас хоёр, гуравдугаар байрт бичигдэж байна. Казахстанаас Хижниченко 51, 58 дахь минутад хоёрыг оруулсан. Харин Польшоос 9 дэх минутад Капустка нэгийг оруулсан бол Левандовски 35 дахь минутад торгуулын цохилтоос нэгийг оруулжээ.

Энэ хэсгийн гурав дахь тоглолт Румын болон Черногорын шигшээн хооронд болж, 1:1-ээр тэнцэж өндөрлөлөө.