Хятад-Монгол-Оросын эдийнзасаг, худалдаа хамтын ажиллагааны чуулга уулзалт БНХАУ-ын Эрээн хотноо болж байна. Тус уулзалт ес дэх удаагаа зохион байгуулагдаж байгаа юм. Энэ удаагийн уулзалтад манай улсаас 180 гаруй аж ахуйн нэгж, 300 гаруй бизнес эрхлэгч оролцож байгаа аж.

Мөн энэ үеэр Эрээн хотноо Хилийн иргэдийн худалдааны чөлөөт бүсийн нээлтийг хийлээ. Уг чөлөөт бүс ашиглалтад орсноор найман мянган юанаас доош хэмжээний худалдан авалтад ямар нэг татвар төлөхгүй болох аж. Түүнчлэн чөлөөт бүсэд нэвтрэх тээврийн хэрэгслийг татвараас чөлөөлж байгаа юм байна.

Чөлөөт бүсийн худалдааны танхимд худалдаа эрхэлж буй Монголын талынхныг эхний нэг сар түрээсийн төлбөрөөс чөлөөлжээ. Одоогийн байдлаар Монголын 400 орчим аж ахуйн нэгж тус бүсэд худалдаа эрхлэхээ мэдэгдээд байгаа аж.