Улсын онцгой комисс өнөөдөр хуралдаж Үндэсний баяр наадмын зохион байгуулалтын асуудлыг хэлэлцжээ. Иргэд олон нийтийн зүгээс гаргаж буй саналаас гадна Эрүүл мэндийн яам, эрдэмтэн судлаачдын санал дүгнэлт, эрсдэлийн үнэлгээнд тулгуурлан наадмыг хойшлуулах саналыг Засгийн газарт оруулж байгаа гэдгээ ХЗДХ-ийн сайд Х.Нямбаатар хэллээ. Засгийн газар маргааш 09 цагт ээлжит бусаар хуралдан баяр наадмыг хойшлуулах асуудлыг эцэслэн шийвэрлэх юм. Тэрээр "Нийтээр тэмдэглэх өнгөрүүлэх баяр наадмын тухай хуульд шилжүүлэн хийх тухай заалт байхгүй. Хойшлуулах, шилжүүлэх тохиолдолд заавал хуульд өөрчлөлт оруулдаг. Тиймээс "Цар тахлын" тухай хуулиар баяр наадмыг хойшлуулах, хязгаарлах эрх олгосон. Хөдөө орон нутаг баяр наадам хийх эсэхийг долоодугаар сарын 20-ноос хойш цар тахлын нөхцөл байдал ямар байхыг харгалзан үзэж, УОК шийдвэрлэнэ. Нэгэнт баяр наадам бүтэн жилээр хойшилж байгаатай холбогдуулан хэрхэхийг Засгийн газрын хуралдаанаар шийднэ" гэлээ. Баяр наадмын нээлтийн үйл ажиллагааг цахимаар зохион байгуулахаар бэлтгэж Хүй долоон худагт урлаг соёлын уран бүтээлчид бичлэгт ороод байсан. Нэгэнт хийсэн  видео контентуудыг  баярын өдрөөр телевизээр цацахаар төлөвлөж байгаа гэлээ.