Цар тахлын нөхцөл байдлын талаарх цаг үеийн мэдээллийг Эрүүл мэндийн яамнаас мэдээлж байна. Сүүлийн 24 цагт халдварын 1294 тохиолдол илэрч, 21-80 гаруй насны долоон иргэн нас баржээ. Өнгөрсөн хоногт 2126 хүн эдгэрч, тусгаарлалтаас гарчээ. Хэвтэн эмчлүүлж буй 10368 иргэн байгаагийн 1806 нь хүүхэд, 436 нь жирэмсэн эх байна. ХӨСҮТ-ийн захирал Л.Баттөр дараах мэдээллийг өглөө. Тэрээр “Улаанбаатарт 398, орон нутагт 896 шинэ тохиолдол илэрлээ. Баян-Өлгий, Дархан-Уул, Булган, Сэлэнгэ аймагт халдварын тоо нэмэгдэх хандлагатай байна. Ард иргэдийн дунд шинжилгээний тоо буурсан учраас халдварын тохиолдол буурч байна уу гэх эргэлзээ байна. Улаанбаатар хотын хэмжээнд дөрөвдүгээр сартай адил халдварын эерэг эзлэх утга буурсан. Бид дөрөвдүгээр сард 28 хоногийн хатуу хөл хорио тогтоосон. Энэ үед халдварын тохиолдол 300 илэрч байсан. Өнөөдөр Улаанбаатар хотын хэмжээнд халдварын тоо 398 бүртгэгдсэн. Энэ нь нийслэлд халдварын тохиолдол буурч байгаагийн илрэл юм” гэлээ.