“A sound” хамтлагийн “Yesterday” тоглолт өнөөдөр Улаанбаатар чуулгад болох юм. Тоглолтынх нь талаар  хамтлагийн ахлагч Ц.Тэмүүлэнтэй цөөн хором ярилцлаа.

 

-Өнөөдөр тоглолт болно. Бэлтгэлээ сайн хангасан байх. Өдөрт хэдэн цаг бэлтгэл хийсэн бэ?

 

-Тоглолт маань өнөөдөр Улаанбаатар чуулгад орой 19:30 цагт эхэлнэ. Тоглолт болох гэж байгаа болохоор их сайхан байна. Бид бэлтгэл сайн хийсэн. Өдөрт ойролцоогоор найман цагийн бэлтгэл хийсэн шүү. Өглөө 12:00 цагт ирээд орой 12:00 цаг хүртэл бэлтгэлээ хийсэн.

 

-Яагаад Битлз хамтлагийн дуунуудаар тоглолт хийх болсон юм бэ. Танай хамтлаг Битлзийн дууг орчуулж дуулсан. Тэр төслийн үргэлжлэл үү?

 

-Бид Битлзийн дуугаар тоглолт хийх санааг таван жилийн өмнө олсон. Битлзийг мэдэхгүй хүн байхгүй. Бидний үеийнхэн мэднэ. Биднээс дээш үе, мөн доош үеийн дүү нар ч гэсэн мэддэг. Тиймээс Битлз хамтлагийн оркестртой дуулж, тоглолт хийвэл сонирхолтой юм байна гэж хамтлагаараа ярилцаж байсан юм. Тэгээд энэ санаагаа хэрэгжүүлж чадахгүй байсаар одоо хийх гэж байна. Билтз хамтлагийн дууг орчуулж дуулдаг нь өөр төсөл л дөө. Тэр төсөлтэй манай хамтлагийн тоглолт ямарч хамаагүй. 

 

-Симфони оркестортой тоглолт хийх гэж байна. Өмнө нь оркестортой тоглолт хийсэн амьд хөгжмийн хамтлаг Монголд байдаггүй байх?

 

-Манай оронд оркестортой бүрэн хэмжээний тоглолт хийсэн амьд хөгжмийн хамтлаг бараг байхгүй байх. Би оркестортой тоглолт хийлээ гэж сонсч байгаагүй. A sound хамтлагийн хувьд ч гэсэн анх удаагаа энэ тоглолтыг хийж байна л даа. 

 

-Танай хамтлагийнхан хоорондоо тоглоод сурсан шүү дээ. Симфони оркесторын өөр багтай хамтарч тоглох амаргүй байгаа байх. Оркестортой хамтарч тоглох ямар байна вэ?

 

-Үнэхээр сонирхолтой. Симфони оркестортой хамт цуг тоглох сайхан байна. Өмнө нь зөвхөн хамтлагаараа л тоглодог байсан бол одоо бүхэл бүтэн оркестрийн багтай хамтарч тоглож байна. Тэр хүмүүсийг мэдэрч, нэг нэгтэйгээ ойлголцож тоглох нь чухал. Оркестортой тоглох их таалагдаж байгаа. 

 

-Тоглолтынхоо талаар дэлгэрэнгүй мэдээлэл өгөхгүй юу. Ямар онцлогтой тоглолт болох гэж байна?

 

-Ер нь гадаадын бусад оронд Битлз хамтлагийн дууг симфони оркестортой дуулсан хувилбарууд бий. Бид хамгийн шилдэг гэсэн дуунуудаа түүвэрлэж авч, тоглоно. Зарим дууг нь оркесторгүйгээр хамтлагаараа дуулж байгаа. Нийт 25 гаруй дуу дуулна. Манай тоглолтод Улаанбаатар чуулгын залуу уран бүтээлчид оролцож байгаа гэдгээрээ онцлогтой. Мөн симфони оркестортой дуулж байна гэдэг нь хамгийн гол онцлог болох болов уу. Дууны оркестрын хөрвүүлэг, найруулгыг төгөлдөр хуурч Т.Пүрэвсүх, Оюука нар хийсэн. Харин удирдаачаар Д.Нямдаш ажиллалаа. Нийт 35 гаруй уран бүтээлчид оролцох юм.

 

-A sound хамтлагийн 10 жилийн ой ирэх наймдугаар сард тохионо. 10 жилийн ойдоо зориулж олон ажил төлөвлөсөн үү. Баяраа хэрхэн тэмдэглэх гэж байна?

 

-Одоохондоо нарийн төлөвлөгөө гараагүй. Эхний удаа энэ тоглолтыг хийнэ. Одоогоор манай хамтлаг хоёр цомог гаргасан. Арван жилийн ойдоо зориулж гурав дахь цомгоо гаргая гэсэн төлөвлөгөөтэй байгаа. 

 

- A sound хамтлаг 10 жилийн ойдоо зориулж бие даасан тоглолт хийнэ гэсэн мэдээлэл байсан?

 

-Үгүй. Яг одоохондоо тоглолт хийнэ гэсэн төлөвлөгөөгүй байгаа. 10 жилийн ойдоо зориулж шинэ цомог гаргана.

 

-Өнгөрсөн тавдугаар сард “Үнэний дуу” нэртэй уран бүтээл гаргасан. Үзэгчдийн анхаарлыг нэлээд татсан. Яагаад тэр дууг дуулах болсон юм бэ?

 

-Тэр дууг дуулахыг Монголын залуучуудын холбоо санал болгосон. Тэр дууг манай хамтлаг биш би дуулсан. Ер нь өнөөгийн нийгэмд шударга бус зүйл их болсон. Юунд ч, хэнд ч итгэхэд бэрх нийгэм дундаас л үнэнийг хайж байгаа хүний тухай л дуу юм. “Үнэний дуу”-г дуулах саналыг Монголын залуучуудын холбоо тавьсан. Тэгээд л дуулсан.