Өнөөдөр Орхон аймгийн ЕБС-ийн төгсөгчид “Эрдмийн баяр”-аа тэмдэглэж байна. Аймгийн Засаг дарга бөгөөд Эрдэнэт хотын захирагч С.Батжаргал Баян-Өндөр сумын Шанд багийн 17-р сургуулийн төгсөлтийн баярт оролцлоо. Тус сургуульд 2021-2022 оны хичээлийн жилд нийт 32 сурагч 12-р ангиа төгсөж байгаа ажээ. Нийт сурагчдад хандаж аймгийн Засаг дарга мэндчилгээ дэвшүүлж үг хэллээ.

Тэрээр: Сурагчдын сурлагын чанарыг сайжруулах хүрээнд хийгдэж буй ажлаа танилцуулсан бөгөөд зорилготой, хүсэл тэмүүлэлтэй, тууштай зүтгэлтэй байж хүссэн мэргэжлээ, чанартай эзэмших хэрэгтэй гэдгийг захилаа. Энэ жил аймгийн хэмжээнд 1-12-р ангийн 23700 гаруй хүүхэд суралцаж төгсөж байгаагаас 12-р ангийг 1110 сурагч, 9-р ангийг 1826 сурагч, 1-р ангийг 2400 гаруй хүүхэд төгсөж Эрдмийн баяраа тэмдэглэж байна.

Түүнчлэн элсэлтийн ерөнхий шалгалтыг 1188 хүүхэд өгөх юм. Үүнд өмнөх оны 165 сурагч хамрагдана. Орхон аймаг ЕБС-ийн төгсөгчдөө элсэлтийн ерөнхий шалгалтад бэлтгэх зорилгоор E-Lab хөтөлбөрийг хэрэгжүүлэн ажиллаж байгаа. Үүний үр дүнд өнгөрсөн хичээлийн жилд элсэлтийн шалгалтын дундаж оноо 547,55 болж өсжээ. Мөн 16 хүүхэд 5 хичээлийн төрлөөр 800 оноо авсан бөгөөд эдгээр сурагчдыг Засаг даргын нэрэмжит оюутны тэтгэлэгт хамруулаад байна. Мөн төгсөх ангийн сурагчдын математик, физикийн хичээлийн хоцрогдлыг арилгах, элсэлтийн шалгалтад бэлтгэх зорилгоор МУИС-ийн багш нартай хамтран “эгэл бүхэл арга зүй” төслийг хэрэгжүүлж байгаа юм.