Өвөрхангай аймаг дахь Политехникийн коллеж хичээлийн шинэ жилийн нээлтээ хийж, суралцагчдаа хүлээн авлаа. Өнгөрсөн хичээлийн жилд тус сургууль 1270 сурагчид мэргэжлийн болон техникийн боловсролыг олгосон бол энэ жил 1362 сурагчид хөдөлмөрийн зах зээл дэх эрэлттэй мэргэжлүүдийг эзэмшүүлэхээр бэлтгэлээ хангасан байна.

Политехникийн коллежид суралцах сонголт хийсэн хүүхэд, залуусыг үеийнхнээсээ хоёр алхмын өмнө яваа гэдгийг онцлон хэлмээр байна. Одоо бол мэргэжлийн боловсрол “трэнд” болж буй цаг. Их, дээд сургуулийн эрэлт, хэрэгцээгүй мэргэжлээр дөрвөн жил суралцаад ажилгүй яваа залуусаас МСҮТ, коллеж төгссөн хүүхдүүд ажлын байранд гарч, амьдралд эрт хүрч байгаа.

Улс, аймгаа хөгжүүлэх, үйлдвэрлэгч орон болоход ч мэргэжлийн боловсрол эзэмшсэн, дадлага туршлага, ур чадвартай ажилчдын хүч ихээхэн чухал байна. Энэ давуу талыг соргогоор олж харан суралцаж байгаа хүүхэд, залуус, тэдэнд эрдэм мэдлэгийг олгож байгаа багш нартаа талархал илэрхийлье.