Валентины баяр хэмээн залуус цэцэг, шоколад барьж гүйлдэж байтал ердөө хэдхэн хоногийн дараа Билгийн улирлын Цагаан сарын шинийн 1 тохиож улс даяараа долоо хоног дээл бүс, хөөргөөрөө гайхуулан баярлав. 

Өчигдөр гуравдугаар сарын 1. Эрх баригч МАН анх байгуулагд­сан буюу анхдугаар хурлаа хий­сэн өдөр. МАН үүний өмнө эрх барьж байхдаа энэ баяраа илүү ач холбогдолтой, улсын хэмжээний том баяр болгох гэж “Эх орончдын өдөр” хэмээн нэрийдсэн. Үнэндээ нам анх байгуулагдаж байхад бол яах аргагүй эх орончид цугласан л даа. Өчигдөр сонины дугаар бэлтгэх гэж төлөвлөсөн зарим зүйлээ бичихийн тулд сэтгүүлч сурвалжлагчид маань ийш тийш, төрийн байгууллагууд руу утасдахад гол төлөв хүмүүс, албан тушаалтнууд ажил дээрээ байхгүй, гадуур ажилтай явна гэсэн хариу өгсөн нь үнэндээ намынхаа баярыг тэмдэглээд “завгүй” байсан хэрэг байх нь. Энд тэндгүй нүсэр том хурал цуглаан, хүлээн авалт, одон  тэмдэг болох нь дамжиггүй. 

Цагаан сарын айлчлал дуусаагүй байхад эрх баригч нам баяраа тэмдэглэн, энэ намын харьяалал бүхий албан тушаалтнууд, энэ намын ивээлд амьдардаг хүмүүс бас баярлах нь энэ. Одоо  намын залуу хүчнүүд өөрсдийгөө тэжээгч намын баяраа хэд гурав хоног тэмдэглээд ажил хийсэн хийгээгүй хоёрын хооронд байтал Олон улсын эмэгтэйчүүдийн эрхийг хамгаалах өдөр залгана. 

Ээжтэй, эхнэртэй, найз бүсгүйтэй бүхэн энэ баярыг тэмдэглэхээс аргагүй. Баяр болохоос хэдэн хоногийн өмнөөс л эдэндээ өгөх бэлэг сэлтээ бэлтгэх гээд эрчүүд ажил дээрээ орж гараад тогтворгүй байх нь л дээ. Ээжүүд маань төрийн тэргүүнээсээ одонгоо авч, үр хүүхдүүдээ баярлуулан, өөрсдөө ч бас ажил албаныхан, найз нөхөдтэйгөө  цуглан баярлаж байтал энэ баярын араас Эрчүүдийн баяр залгана.

Угтаа бол Монгол Улсад орчин цагийн зэвсэгт хүчин байгуулагдсан өдөр л дөө. Зэвсэгт хүчний анги салбарууд, Батлан хамгаалах яам, Зэвсэгт  хүчний Жанжин штабын л тэмдэглэх баяр. За яахав цэргийн жинхэнэ алба хаасан бэлтгэл дайчид тэрүүхэн зуураа тэмдэглэн баярлаж болох юм биз. Гэтэл манайхан мөн л цар хүрээг нь өргөтгөн Эрчүүдийн баяр болгоод бүх нийтээрээ сүртэй тэм­дэглэдэг болчихсон хэрэг.

Өчигдөр, өнөөдөр, магадгүй маргааш МАН-ынхан дээр доргүй баярлаж үндсэндээ ажил хийхгүй, УИХ-ын гишүүд бол бүр хэдийнээс хийсэн ажилгүй хөдөө айлуудаар хэсэн улс орноо цэцэглүүлэн хөгжүүлснээ гайхуулан ууц таллан, бууз идэх ажлаа дуусгаагүй байхад намынхаа баяртай залгаж байгаа. Ирэх онд сонгууль болох юм болохоор хаа явсан газраа намын баяраа тэмдэглэж намын гишүүдээ цуглуулан уулгаж идүүлэн, шагнал тарааж “ирэх жил намаа, намайг дэмжээрэй” гээд шивнэж яваа. Одоо залгаад эмэгтэйчүүдийн баяраар тараах шагнал, эд зүйл цүнхэнд нь бас нөөцлөөстэй. Ийн хамаг  томцуул нь талын нэг тараад дайлуулж цайлуулж яваа болохоор доод албатууд нь бас сулдаа ганхаад алга болно. Ийн бодоход энэ гуравдугаар сард ар араасаа залгасан олон баярын дуулианд  төрийн байгууллагууд нэг их тогтвортой сууж, тодорхой бүтээл гаргахгүй нь ойлгомжтой, гэхдээ цалин­гаа бол бүрэн авна л даа. Төрийн байгууллага, хяналт шалгалтынхан, татвар, гаалийн байгууллагынханд дээрэлхүүлэн байж жаал юм борлуулж амьдардаг, ар гэрээ тэжээдэг хэдэн худалдааны байгууллагынхан л ажиллана.

Эх сурвалж: Монголын мэдээ сонин
2023 оны гуравдугаар сарын 02. Пүрэв. №033 (5761)