М.Даваадулам

Сүүлийн үед төрийн албан хаагчийн ёс зүйгүй үйлдэл, хууль зөрчсөн үйл ажиллагааны талаар хэвлэл мэдээллийн хэрэгслээр болон сошиалаар  ихээхэн бичих болсон. Бичихээс ч аргагүй байдал гаргаж байгаа нь үнэн.

Энэ талаар иргэд ам дамжуулан ярисаар. Монгол Улсын иргэн төрийн захиргааны албанд анх орохдоо тэд  “Эх орон, ард түмнийхээ төлөө эрдэм чадлаа зориулж, Монгол Улсын хууль, ёс зүйн хэм хэмжээг чанд сахиж, үндэсний язгуур ашиг сонирхолд захирагдан албан үүргээ үнэнч шударгаар биелүүлэхээ тангараглая. Тангаргаа няцвал хуулийн хариуцлага хүлээнэ” хэмээн тангараг өргөдөг ч хэсэг хугацааны дараа авилгач, хүнд сурталтан, дарангуйлагч болсон байдаг нь нууц биш, тоо нь ч бас тийм бага биш байдаг гэдгийг хэлэх юун.

Төрийн албанд ажиллагсад жил бүр л ёс зүйн зөрчил гаргасныг байгууллагын дэргэдэх ёс зүйн зөвлөлөөр хэлэлцэн, холбогдох хууль тогтоомжийн дагуу зохих арга хэмжээ авсан гэдэг тоо баримт жилийн эцэст гардаг, өнгөрсөн жилийн тухайд 4028 хүн гэсэн тоо байх жишээтэй. Энэ бол тийм бага тоо биш шүү дээ. Төрийн албаны тухай хуульд төрийн жинхэнэ албан хаагч нь албан тушаалын бүрэн эрхээ урвуулан ашиглах, бусдыг бэлгийн болон хувийн ашиг сонирхолдоо нийцүүлэн аливаа хэлбэрээр хүчирхийлэн дарамтлах, хавчин гадуурхах, эрхшээлдээ байлгахыг хориглоно хэмээн хуульчилсан ч манай зарим дарга нэрт энэ хуулийг мэддэггүй юм уу эсвэл мэдэхийг хүсдэггүй юм уу бүү мэд, энд тэнд дээрх хориглосон үйлдлийг хийсэн дарга нар байгаад д байна.

Тухайлбал, дээд албан тушаалтан нь доод албан тушаалтныг хэл амаар доромжлох, зодож танхайрдаг, хувийн мэдээллийг нь тараадаг, архи тамхи хэрэглэхийг шаарддаг гэх мэтээр  дарамталж, дээрэлхэх үзэгдэл төрийн байгууллагуудад гарч байна. Үүгээрээ  төрийн бүх албан хаагчдыг хэлэх гээгүй ч ийм байдал сүүлийн үед нэлээд их байгааг хэлэх байна.

Төрийн албаны сонгон шалгаруулалтыг хийхдээ уг нь уг хүний боловсрол, багаар ажиллах чадвар, нийтэч зан, ёс суртахууны доголдолгүй байдал зэргийг харж намын харъяалал харгалзахгүйгээр  шалгаруулж авдаг байсан бол сүүлийн үед танил тал, улс төрийн намын харьяалал,  авлигаар төрд авдаг нь нууц биш болсон. Энэ замаар ажилд орсон хүнээс үр дүн, зан харьцаа горьдох нь илүүц биз. Харин тэднээс олны дунд яригддаг болж бүтэхгүй үйлдэл л гарах нь тодорхой шүү дээ. Ялангуяа хөдөө орон нутагт дарга нар нь албан хаагчдаа дээрэлхэх, зодох, архи дарс дарамтлан уулгах, ажлын байрны бэлгийн дарамт гээд нэлээдгүй хэрэг зөрчил гардаг, тэр тухай хэвлэл мэдээллээр ч их гардаг. Түүнчлэн цэрэг, цагдаагийнхан ч мөн энгийн иргэд, хугацаат цэргийн албан хаагчаа гэмтээсэн, бэртээсэн, эрх чөлөөнд нь халдсан, амь насаа алдахад хүргэсэн  тохиолдлууд ч бий. 

Энэ мэтээр төрийн албан хаагчид гэмт хэрэг үйлдэж байна. Тиймээс  Төрийн албаны зөвлөл, цаашлаад төрийн бүх байгууллагууд  төрийн албаны хууль тогтоомжоо баримтлан ажилд авахаас гадна, үүрэгт ажлаа хэрэгжүүлж чадвал төрийн албан хаагчид ёс зүйн зөрчил гаргах нь багасна гэж бодож байна. Ингэснээр төрийн нэр хүнд дээшлэнэ гэдгийг  бодох цаг нь болжээ.

Эх сурвалж: Монголын мэдээ сонин

2023 оны дөрөвдүгээр сарын 10. Даваа. №060 (5788)