МСБХ-ны Үндэсний Дээд лигийн 2022-23 оны аваргын төлөөх цувралын хоёр дахь тоглолт боллоо. Тэнүүн Өлзий Металл болон Эрдэнэт Майнерс багуудын цувралын хоёр дахь тоглолт 74-82 харьцаатай өндөрлөлөө. Эрдэнэт Майнерс баг хожил авснаар цувралыг 2-0 болгож том давуу талыг аваад байна. Хоёр багийн цувралын гурав дахь тоглолт дөрөвдүгээр сарын 14-нд буюу баасан гарагт болно.

ТОГЛОЛТЫН БААТАР: Өчигдөр Эрдэнэт Майнерс баг багаараа жигд тоглож дөрвөн тоглогч 10-аас дээш оноо бүртгүүлсэн юм. Пендарвис Уиллиамс 19 оноо авч багаа тэргүүлсэн бол О.Энхбаатар 12, Г.Ган-Эрдэнэ 10, Н.Золжаргал 11, Т.Санчир 11 оноо тус бүр авсан.

ТОГЛОЛТЫН ЭРГЭЛТИЙН ЦЭГ: Тоглолтын хоёрдугаар үеийн цаг сүүлийн 6 минут руу орж 32-28 харьцаатай Тэнүүн Өлзий Металл баг илүү байхад Эрдэнэт Майнерс 10-0 run хийж 32-38 болгосон билээ. Үүнээс хойш Тэнүүн Өлзий Металл баг онооны илүү гараагүй буюу Эрдэнэт Майнерс баг тоглолтын хэмнэлийг удирдсаар хожил авч чадсан.

СТАТИСТИК ХУДЛАА ХЭЛДЭГГҮЙ: Хожигдол амссан Тэнүүн Өлзий Металл баг өнөөдөр багаараа 17 бөмбөг алдалт хийж, Эрдэнэт Майнерс баг бөмбөг алдалтаас 30 оноо авсан. Тэнүүн Өлзий Металл баг эсрэг багийнхаа бөмбөг алдалтаас ердөө 4 оноо авсан байна.