Хуульзүйн сайдаар шинэ томилогдсон Б.Энхбаяр согтуугаар автомашин жолооддог нөхөдтэй хатуу тэмцэхээ илэрхийлээд байна. Үнэхээр согтуугаар машин жолоодсонтой холбоотой гэмт хэрэг зөрчил буурахгүй байгаад хэн хүний сэтгэл зовохгүй байхын аргагүй. 

“Энэ 2023 оны эхний найман сарын байдлаар 33723 зөрчил бүртгэгдэж арга хэмжээ авахуулсан байна. Сүүлийн таван жилийн дунджаар согтуугаар тээврийн хэрэгсэл жолоодсоноос болж жилд 110 хүн амь насаа алдсан” гэсэн мэдээлэл байна. 

Ийм байхад согтуугаар жолоо барьдаг хүнтэй хатуу  тэмцэхээс ч яахав.

Харин Хуульзүйн сайдын хуульд оруулах, "Согтуугаар тээврийн хэрэгсэл жолоодсон зөрчлийг гэмт хэрэгт тооцно. Ингэхдээ дөрвөн ялын сонголтоор гэмт хэрэг” гэж үзэж шоронд хорих гэснийг иргэд янз бүрээр үзэж байна. 

Нэг хэсэг нь зөв гэж байхад, нөгөө зарим нь шорон чинь багтаах юм уу, хүний эрхийг зөрчиж байна гэх мэтээр. Харин нөгөө нэг хэсэг нь хэн ч шоронд орохыг хүсэхгүй, тэгэхээр цагдаа нарт авлига өгөх нь эрс нэмэгдэж, цагдаа нар л баяжина гэх. Хамгийн бодитой үнэлэмж л энэ болов уу. 

Цагдаа, замын хөдөлгөөний зохицуулагч  гэдэг хэзээнээсээ авлигач, тэгээд томхон жип унасан баян тарган, дарга байрын улстай бол яриад байх юмгүй. Ямар сайндаа “даргаа намайг гудамж замд томилж өгнө үү, ар гэр хэцүүхэн байна” гэсэн, “Дээр нь бас цалин өгдөг юм уу” гэх мэт яриа зүгээр ч нэг гараагүй. Одоо халамцуухан нэгэн бол хууль ёсоор нь яваад хоёр гурван жилийн ял авснаас нэг хоёр сая төгрөг цагдаад өгөөд мултрахыг илүүд үзнэ. 

Хуульзүйн сайд Б.Энхбаяр бол  “Согтуугаар тээврийн хэрэгсэл жолоодвол 1-3 жил хүртэлх хугацаагаар жолоодох эрхийг хасаж, 450 мянгаас 2.7 сая төгрөг хүртэл төгрөгөөр торгох эсхүл 240-720 цаг нийтэд тустай ажил хийлгэх, 6 сараас нэг жил хүртэлх хугацаагаар зорчих эрхийг хязгаарлах эсхүл 6 сараас нэг жил хүртэлх хугацаагаар хорино. Мөн ял шийтгэл эдлээд гарч ирсэн этгээд дахин энэ зөрчлөө гаргавал энэ үйлдлийг хүндрүүлэх нөхцөлд тооцож, хорих ялын хэмжээ 2 жил хугацаагаар, торгууль нь нэмэгдэнэ. Зорчих эрхийг нь мөн хоёр жилээр хасна. Хэрвээ энэ үйлдлийг давтан гаргаад байвал ялын бодлого чангарна.

Тээврийн хэрэгслийг согтуурсан мансуурсан үедээ барьж, хүний эрүүл мэндэд хүндэвтэр гэмтэл учруулвал 3-5 жил, хүнд гэмтэл учруулвал 5-8 жил, хүний амь нас хохироовол бүх насаар нь жолоо барих эрхийг нь хасна" гэж байна. 

Үүний оронд согтуугаар автомашин жолоодоод хүний амь нас , эрүүл мэндэд хохирол учруулаагүй л бол  ердөө  автомашин жолоодох эрхийг нь хасчих л даа. Согтуурлынх нь хэмжээнээс шалтгаалаад өөр өөр байж болно. Тэгээд тэр машиныг нь хөдөлгөөнд оролцуулахгүй болгочих. Тэгвэл согтуугаар автомашин жолоодох явдал ч буурна, нийслэлийн замын түгжрэл ч арай гайгүй болно. Тав арван минут алхаад  хүрэх газар явган явж чадахгүй машин унадаг улс жолоодох эрхээ хасуулах ямар байх бол. Шоронд орсноос л илүү хатуу  үйлчлэх болов уу. 

Өнөөдөр бол  нэг хэдэн цаасны торгууль бичээд цахимаар хаягаар нь хүргүүлдэг, түүнийг нь хэн ч төлдөггүй, хуримтлагдаад л байдаг. Замаас нь цагдаа нар бэлэн мөнгөөр торгож хувьдаа завшаад л....

Түүний оронд жолооны эрхийг нь хасаад машиныг нь моторын дугаараар нь хөдөлгөөнд оролцох эрхийг нь хасчихвал өөр хэн нэгэн тэр машиныг жолоодож хөдөлгөөнд оролцохгүй амар юм болно. Үнэхээр манай улс Цахим хөгжлийн сайдтай, цахим улс орон болж байгаа юм бол тэр жолоочийн нэр хаяг, машины дугаар энэ тэрийг нь сүлжээнд оруулаад замын хөдөлгөөний зохицуулагчид харж байдаг болгочих л юм бол хянаад байж болохгүй гэж үү. 

Шоронд хийнэ гэвэл наад хэдэн цагдаа нарын чинь л амьдрал сайжрахаас биш согтуугаар машин барьдаг зөрчил буурахгүй л болов уу. 

Эх сурвалж: Монголын мэдээ сонин

2023 оны аравдугаар сарын 13. Баасан. №159 (5887)