Өвөрхангай аймгийн Бүрд сумын уугуул, Монгол Улсын Хөдөлмөрийн баатар, Төрийн шагналт, Ардын уран зохиолч Дэндэвийн Пүрэвдоржийн мэндэлсний 90 жилийн ойг өнөөдөр ёслол төгөлдөр тэмдэглэн өнгөрүүлж байна.

Ойн хүрээнд аймгийн Төв номын сангийн өмнө байрлах Д.Пүрэвдоржийн хөшөөнд цэцэг өргөж, хүндэтгэл үзүүлэв. Мөн их зохиолчийн нэрэмжит төглийг “Залуус” цэцэрлэгт хүрээлэнд байгуулж, 90 мод тарилаа.

Түүнчлэн ойн нээлтийн үйл ажиллагааг аймгийн төв талбайд зохион байгуулж, “Тусгаар тогтнол” шүлгийг 1200 сурагчид уншиж, тусгаар тогтнол, эрх чөлөөний үнэ цэнийг тунхаглан түгээв.

Арга хэмжээний хүндэт зочдоор Ардын уран зохиолч, МУСГЗ Т.Галсан, Ардын жүжигчин Г.Равдан, МУСГЗ, төрийн шагналт яруу найрагч Д.Төрбат, МУСГЗ Н.Даваадаш, МУСГЗ Б.Хүрэлбаатар, МУСГЗ, МЗЭ-ийн тэргүүн Б.Ичинхорлоо, МУСГЗ Б.Сарантуяа, яруу найрагч Б.Гантулга, Л.Моломжамц, Монгол Улсын анхны ерөнхийлөгч П.Очирбат, Гадаад харилцааны сайд Ц.Гомбосүрэн, Онц бөгөөд бүрэн эрхэт элчин сайд Д.Цахилгаан зэрэг төр, нийгэм, урлаг соёлын нэрт зүтгэлтнүүд болон Дэндэвийн Пүрэвдорж найрагчийн үр хүүхдүүд хүрэлцэн ирж оролцож байна.

Ойн үйл ажиллагаа хөгжимт драмын театрт “Уран үгсийн чуулган”, "Хөх үндэсний гал" яруу найргийн наадмаар үргэлжилж байна.