Тун удахгүй Халловин буюу Сүнсний баяр болох гэж байна. Halloween гэдэг нь All Hallows’Eve буюу Ариун ёслолын өмнөх өдөр гэсэн утгатай аж. Хожим энэ нэршил нь явсаар Halloween болсон юм билээ.Энэ тэмдэглэлт өдөр нь хоёр мянган жилийн өмнө үүссэн гэхэд хэлсдэхгүй. Учир нь эртний Самхайчууд 11-р сарын 1-нд шинэ жилээ тэмдэглэдэг байсантай холбоотой.

Удалгүй Америк, Ирланд, Англи, Францчуудын дунд дэлгэрэн өргөн тэмдэглэх болжээ. Тэгэхээр өмнөх өдөр нь буюу аравдугаар сарын 31-нд үхэгсэдийн ертөнцөөс сайн санаат сүнснүүд эргэн ирж хүмүүсийн бэлдсэн хоол болон дарсаар ундаалдаг бөгөөд ингэснээр муу санаат сүнснүүдээс хамгаалдаг гэж үздэг байна. Хүүхдүүд аравдугаар сарын 31-ний шөнөөр хачирхалтай баатрын дүрд хувиран айлын хаалга тогшин “Trick or Treat” гэж хэлээд чихэр гуйдаг. Энэ нь “чихрээр дайл эсвэл шоглуул” гэсэн утгатай тоглоомын үг юм. Хэрэв амттан өгөхгүй бол тоглоом шоглоом хийнэ гэсэн бяцхан хүүхдүүдийн хөгжилтэй арга мэх аж.

Сүүлийн үед өргөнөөр тэмдэглэх болсон сүнсний баярын түүх ерөнхийдөө нэг иймэрхүү. Ирэх амралтын өдрүүдээр цочиж мэдэхээр араа шүд, цус нөж бүхий баг өмссөн бяцхан жаалууд хаалга тогшин чихэр гуйх аваас бүү уурлаж бухимдаарай.

Бас гартаа таарсан зүйлээрээ цохиж нүдэж, хөөж туух хэрэггүй л болов уу. Өнгөрсөн жилийн сүнсний баяраар олон хүүхэд ухаан дутмаг эс бөгөөс хэт үндсэрхэг үзэлтэй томчуудын хараал зүхлийг барсан. Хөгжиж буй дэлхий ертөнцийн хил хязгааргүй мэдээллийн орчинд өсч торниж буй энэ цаг дор тэднийг буруутгах, үгүйсгэх, үзэн ядах арга байхгүй.

Нөгөөтэйгүүр, энэ баярыг үндэсний үйлдвэрлэгчид овжин ашиглаж, бараа бүтээгдэхүүнээ зах зээлд гаргах маркетинг болгож яагаад ашиглаж болохгүй гэж. Дээр өгүүлсэнчлэн цус нөж болсон аймшгийн баг зүүн нялхасыг уйлж, томчуудын хараалыг барж байхын оронд жигнэмэг, шоколод, чихэр, чипс, банана, тарвасны баг өмсчихөөд айлын хаалга нүдэн чихэр гуйх аваас өхөөрдөж ирээд л тавагтай чихрээ тарааж мэдэх юм. Нөгөөтэйгүүр, нийгэм тэр чигтээ айдаст автаж буйг мартаж болохгүй. Өдөр алгасалгүй шахам хүүхэд алга болсон тухай мэдээлэл хэн бүхний сэтгэлийг түгшээх боллоо.

Цэцэг цэврүү шиг нялх балчир үрс минь амттан олохоор харайлгаж яваад гаж донтонгуудын бузар сарвуунд өртчих вий. Өндөр өндөр шил толь болсон орон сууцны хорооллын аль нэг давхарт хүүхэд алга боллоо гэхэд хаана гэж хайх билээ. Эрж хайн, камер энэ тэрийг шүүх гэсээр байтал цонхоор шидчихвэл яана. Ингээд бодохоор томчууд бид л сүнсний баярыг хүүхдийн сонирхоод байгаа хүсэлд нийцүүлэн өөрсдөө зохион байгуулахаас өөр гарц гаргалгаа алга.

Үүний тулд хүнс үйлдвэрлэгчид болон чихэр, жимс, амттан оруулж ирдэг аж ахуйн нэгжүүд хүн ам олонтой хороолол, хотхон дотроо тусгайлан талбай засч амталгаа явуулж, багачуудыг баярлуулбал яасан юм бэ. Бүтээгдэхүүнээ ч хэрэглэгчдэд нь сурталчлаад авна, эцэг эхчүүд ч талбай тойрон сэтгэл амар хүүхдүүдээ баярлуулчихна. АНУ гэхэд ганцхан өдрийн дотор 22,5 тонн чихэр болон бусад амттаныг өнгөрсөн жилийн энэ өдөр борлуулсан байдаг.

Түүний дотор сникирс тэргүүлсэн тухай мэдээлэл олж үзлээ. Хүүхдийн төв номын сангийн ажилтан, албан хаагчид “ Сүнсний баяр бус хүнсний баяр” арга хэмжээг санаачилан өөрсдийн гараар бэлтгэсэн амттанаар хүүхэд багачуудыг дайлахаар зэхэж буйг дашрамд дуулгахад таатай байна. Баярын арга хэмжээ Хүүхдийн төв номын сангийн байранд ирэх амралтын өдрүүдэд зохион байгуулагдана. Үндэсний үйлдвэрлэгчид, чихэр, шоколод тэргүүтэй амттан оруулж ирдэг компаниудтай хамтран ажиллахад бэлэн гэдгээ илэрхийлж байсныг та бүхний сонорт хүргэе.

Эх сурвалж: Монголын мэдээ сонин

2023 оны аравдугаар сарын 27. Баасан. №165 (5893)