Томуу, томуу төст өвчин идэвхжлийн түвшинд шилжсэнтэй холбогдуулан хүүхдийн тусламж, үйлчилгээг тасралтгүй, чирэгдэлгүй үзүүлэх зорилгоор эмнэлгүүдийн хүртээмжтэй байдлыг нэмэгдүүлэх Эрүүл мэндийн сайдын тушаал гарсан.

Энэ хүрээнд Эх, хүүхдийн эрүүл мэндийн үндэсний төв, Эх, нярай, эмэгтэйчүүдийн үндэсний төв I, Цэргийн төв эмнэлэгт 2023 оны 12 дугаар сарын  1-нээс 2024 оны гуравдугаар сарын 1-нийг хүртэл нэмэлтээр Хүүхэд судлалын үндсэн мэргэшлийн резидент эмч, Анагаахын шинжлэх ухааны үндэсний их сургуулийн Сувилахуйн мэргэжлийн төгсөх дамжааны оюутнуудыг ажиллуулахаар болжээ.

Ингэхдээ оюутнуудын үндсэн сургалтыг тасалдуулахгүйгээр үргэлжлүүлэх, эмнэлзүйн сургагч болон мэргэжлийн багш нарын удирдлага дор эмнэл зүйн дадлагыг ажлын байранд хийлгэх, урамшуулал, хоол, унааны зардлыг олгох юм.

Энэ дагуу АШУҮИС-ийн Сувилахуйн сургуулийн 92 оюутныг ЭНЭҮТ /40/, ЭХЭМҮТ /40/, Цэргийн төв эмнэлэгт /12 сувилагчийн туслахаар ажилуулж байна. Мөн 10 резидент эмчийг ЭХЭМҮТ, Цэргийн төв эмнэлэгт  хуваарилжээ.

Эх сурвалж: ЭМЯ