2024 оны 01 дүгээр сарын 19-ний 08 цагаас 2024 оны 01 дүгээр сарын 20-ны 08 цаг хүртэлх цаг агаарын тойм

Цасны зузаан: Өнөө өглөөний цаг уурын станц, харуулын цасны зузааны мэдээгээр Баян-Өлгийн хойд, Баянхонгорын өмнөд хэсгээр цасгүй, бусад нутгаар 0.0-37.0 см зузаан цасан бүрхүүл тогтсон байна. Үүнээс хамгийн их нь Увсын Малчинд 37.0 см, Сагилд 32.0 см, Төв аймгийн Эрдэнэсантад 31 см, Баруунтуруун, Давст, Хяргаст 30.0 см, Увсын Улаангом, Сэлэнгийн Бугантад 29.0 см, Увсын Зүүнговь, Сүхбаатарын Түмэнцогтод 28.0 см, бусад хэсгээр 0.0-25.0 см цасан бүрхүүл тогтсон байна.

Хур тунадас: Өнгөрсөн хоногт баруун аймгуудын нутгийн зүүн өмнөд хэсэг, төв, говь, зүүн аймгуудын ихэнх нутгаар 0.0-6.2 мм цас орсон. Үүнээс хамгийн их нь Өмнөговийн Мандал-Овоод 6.2 мм, Өмнөговийн Манлай, Дорноговийн Замын-Үүд, Сүхбаатарын Баяндэлгэр, Онгон сумд орчмоор 5.0-5.7 мм, Дундговийн Дэрэн, Дорноговийн Хөвсгөл, Сүхбаатарын Наран сумд орчмоор 4.0-4.7 мм, бусад нутгаар 0.0-3.7 мм цас орсон байна.

Агаарын хамгийн их температур: Өчигдөр өдөр Увс нуур болон Дархадын хотгор, Тэс голын хөндийгөөр -26...-31 градус, Монгол-Алтай, Хангай, Хөвсгөл, Хэнтийн уулархаг нутаг, Байдраг, Идэр, Эг, Үүр, Хараа, Ерөө, Хэрлэн, Онон, Улз, Халх голын хөндийгөөр -18...-24 градус, говийн бүс нутгийн баруун өмнөд хэсгээр -9...-14 градус, бусад нутгаар -14...-19 градус хүйтэн байв.

Агаарын хамгийн бага температур: Нутгийн баруун хойд хэсгээр хүйтний эрч нэмж чангарч Увс нуур болон Дархадын хотгор, Завхан голын эх, Идэр, Тэс, Байдраг голын хөндийгөөр -39...-46 градус, Алтай, Хангай, Хөвсгөлийн уулархаг нутаг, Эг, Үүр, Хараа, Ерөө голын хөндийгөөр -31...-37 градус, говийн бүс нутгийн өмнөд хэсгээр -19...-24 градус, бусад нутгаар -22... -29 градус хүйтэн байв.

Cалхи: Ихэнх нутгаар секундэд 3-8 метр, говь, тал, хээрийн бүс нутгаар секундэд 11-13 метр хүрч ширүүссэн байна.

Улаанбаатар хот орчмоор: Өнгөрсөн хоногт 1.6-2.6 мм цас орж, цасны зузаан 16-20 см байна. Салхи баруун хойноос секундэд 3-8 метр. Өчигдөр өдөр -15...-17 градус, өнгөрсөн шөнө Яармаг-Сонгины орчмоор -27 градус, бусад хэсгээр -22 градус хүйтэн хоносон байна.

2024 оны 01 дүгээр сарын 19-ний өдөр, 20-ны өглөө 08 цаг хүртэлх өдрүүдийн аюултай үзэгдлийн тойм: 

Цасан шуурга: 19-нд Өвөрхангай аймгийн нутгийн зүүн хэсгээр 0.4-2.0 мм цас орж, салхи секундэд 10-12 м/с хүрч, цасан шуурга 3-5 цаг, Дундговь аймгийн нутгийн төв болон зүүн хэсгээр 0.2-4.0 мм цас орж, салхи секундэд 10-12 м/с, цасан шуурга 3-5 цаг, Дорноговь аймгийн нутгаар 0.3-2.0 мм цас орж, салхи секундэд 10-12 м/с, цасан шуурга 7-10 цаг, 19-20-нд шилжих шөнө Дорноговь аймгийн нутгаар 0.8-3.0 мм цас орж, салхи секундэд 10-12 м/с, цасан шуурга 4-10 цаг, Сүхбаатар аймгийн нутгийн баруун хэсгээр 1.0-5.0 мм цас, салхи секундэд 10-12 м/с, зарим үед секундэд 16 м/с, цасан шуурга 3-7 цаг үргэлжлэн цаг агаарын аюултай үзэгдэл ажиглагдсан байна.

ЦАГ УУР, ОРЧНЫ ШИНЖИЛГЭЭНИЙ ГАЗАР

Урьдчилан Мэдээлэх Хэлтэс