Өвөрхангай аймгийн Баруунбаян-Улаан, Зүүнбаян-Улаан, Хужирт, Бүрд, Есөнзүйл сумдын цасанд боогдсон малчин өрхүүдэд тусламж үзүүлэхээр аймгийн Онцгой байдлын газраас 2 алба хаагч, Зэвсэгт хүчний 256 дугаар ангийн 8 албан хаагч, “Зил-131”, “Урал-420” маркийн туулах чадвартай дөрвөн автомашинтайгаар ажиллаж байна. Дээрх баг бүрэлдэхүүн малчдад түлээ нүүрс, өвс хивэг хүргэх, отор нүүдэл хийхэд нь тусалж, зам давааг нээх үүрэгтэйгээр ажиллаж байгаа юм.

Өнөөдөр 18:00 цагийн байдлаар Хужирт суманд 80 км газарт цас түрж зам гаргаад байна. Мөн Зүүнбаян-Улаан сумын 27 малчин өрхийн хотонд нь өвс, хэвгийг хүргэж, шаардлагатай тусламжийг үзүүлжээ. Түүнчлэн цасанд суусан 10 гаруй суудлын автомашиныг татан гаргаж, аюулгүй байдлыг хангасан байна. Цасан шуурга тасралтгүй үргэлжилж байгаа тул цас түрж, зам гаргахад хүндрэл учирч байгаа бөгөөд зарим тохиолдолд гаргасан зам буцаад цасанд дарагдаж байгаа тухай мэдээллээ.