Английн премьер лигийн 8 дугаар тойргийн эхний тоглолтууд өнгөрсөн шөнө боллоо. Энэ тойрогт хүснэгтийг тэргүүлэгч “Манчестер Сити” клуб талбайдаа “Эвертон”-ыг хүлээж авч, 1:1-ээр тэнцлээ. Эхий зургаан тойрогт дараалан хожоод байсан “Сити” ийнхүү сүүлийн хоёр тойрогт нэг хожигдож, нэг тэнцэж, 5 оноо алдаад байна.

Тоглолтын 64 дэх минутад Лукаку улирлын 5 дахь гоолоо оруулж, тооны харьцааг нээсэн. Тэгвэл 72 дахь минутад Нолито гоол оруулж, багаа хожигдлоос аварчээ.

Эхний тойрогт “Ливерпүүл”-д хожигдсоноосоо хойш гайхалтай тоглолтыг үзүүлж байгаа “Арсенал” клуб энэ тойрогт талбайдаа “Суонси”-г хүлээж авч, 3:2-оор буулгаж авлаа. Ингэснээр 19 оноотой болсон ч гоолын зөрүүгээр хоёрдугаарт байрт бичигдэж байгаа юм. Тоглолтын 26, 33 дахь минутад Тео Уолкотт хоёрыг оруулсан. Ингэснээр 5 гоолтой болж, мэргэн буучийн жагсаалтад орж ирлээ. Тэгвэл “Арсенал”-ын гурав дахь гоолыг 57 дахь минутад Өзил оруулжээ. Зочдоос Сигурдссон 38, Бастон 66 дахь минутад гоолджээ.

Өнгөрсөн тойрогт “Сити”-г буулгаж авч, хожигдоогүй цувралаа 7 болгоод байгаад “Тоттенхэм” наймдугаар тойрогт “Вест Бромович”-ын талбайд зочилж, 1:1-ээр тэнцлээ. Ингэснээр 18 оноотой болж, хүснэгтийн гуравдугаар байрт бичигдэж байна. Тоглолтын 82 дахь минутад талбайн эздээс Насир Шадли гоолдож, тооны харьцааг нээсэн. Харин “Тоттенхэм”-ээс Деле Алли 89 дэх минутад гоолдож, багаа хожигдлоос аварчээ.

Ингэснээр “Тоттенхэм” эхний 8 тойрогоос 5 хожиж, гурав тэнцэж, ганц ч хожигдолгүй тэмцээнээ үргэлжлүүлж байна.

Бусад тоглолтын үр дүн

Челси 3-0 Лестер

Сток Сити 2-0 Сандерланд

Борнмут 6-1 Халл Сити

Кристал Палас 0-1 Вест Хэм