Байсгээд л цахим орчинд ерөнхий боловсролын сургуулийн сурагчид бие биеэ зодсон, дээрэлхсэн бичлэг тавигдаж бөөн шуугиан тарих болсон. Цагдаагийн байгууллагын мэдээллээс үзвэл   энэ  оны  эхний улирлын байдлаар  хүүхдийн үйлдсэн  гэмт хэрэг 256 бүртгэгджээ.  Үүнээс хүний эрүүл мэндийн халдашгүй байдлын эсрэг 63 хэрэг бүртгэгдсэн нь  өмнөх оны  мөн үеэс 1.6  хувиар  өссөн үзүүлэлт аж. Тэр дундаа сургуулийн орчинд үйлдэгдэх гэмт хэрэг, зөрчил өссөн байна.  Үүнээс  гадна томчуудын зүгээс хүүхдийн эсрэг  үйлдэгдсэн  563 гэмт хэрэгт 613 хүүхэд хохирсон дүн мэдээ гарлаа. Энэ нь өнгөрсөн оныхоос  96 гэмт хэрэг буюу 18.6 хувиар  өссөн дүн юм.

Ийм учраас цагдаагийн байгууллагаас Боловсролын ерөнхий газартай хамтран нэг сарын хугацаатай үе тэнгийн дээрэлхлээс урьдчилан сэргийлэх зорилгоор  “Дээрэлхэл дэлгэрэх ёсгүй” мэдээлэл, сурталчилгааны аян  зохион байгуулж байна. 

Аяны хүрээнд  сургуулийн орчинд сурагчдад дээрэлхлийн талаар үндсэн мэдээлэл, урьдчилан сэргийлэх арга зам, хор уршгийг таниулах, дээрэлхэгчийг гэмт үйлдлээс  татгалзах санаа сэдлийг өгөх зэрэг  нөлөөллийн болон сурталчилгааны ажил, арга хэмжээг зохион байгуулах юм. 

Хамгийн гол нь эцэг, эх асран хамгаалагч нар нь хүүхэдтэйгээ ярилцаж санаа бодлыг нь сонсож  ёстой гэж  сэтгэл зүйчид болон мэргэжлийн хүмүүс хэлдэг. Хүүхэдтэйгээ нээлттэй ярилцаж чадахгүй байгаагаас болж дээрэлхэлтэд өртөх, сэтгэл санаагаар унах, бусдыг дээрэлхэх сэдэл төрдөг нь судалгаагаар нотлогдсон зүйл. 

Өсвөр насны хүүхдүүдийн өөрсдийнх  сэтгэлийг хамгийн их эмзэглүүлдэг зүйл маш олон. Тухайлбал, зарим хүүхэд  гэр бүлийн таарамжгүй харилцаанаас болж үргэлж маргалддаг учраас бас байнга загнуулдаг болохоор тухгүй мэдрэмж авдаг.  Нөгөө хэсэг  нь өөрийгөө бие хүн гэдгээ ухаарч, таньж, мэдэж байгаа болохоор бусдад жаахан хүүхэд шиг харагдахыг хүсдэггүй. Үүнээс гадна үе тэнгийнхээ найз нөхдөд хаягдаж, гологдох мэдрэмж авдаг учраас ганц удаа ч болов найзууддаа үнэлэгдэхийг, хүлээн зөвшөөрөгдөхийг хүснэ. Харин тэдний дунд гэр бүл салалтын хохирогч болж, сэтгэлдээ том хар чулуу тээсээр үлдсэн хүүхэд ч олон байгаа юм.  

Судалгаанд хамрагдсан 13 настай хүү "Найзууд маань гэр рүүгээ явахдаа ч юм уу өөр тийшээ явахдаа хаяад явчихдаг. Бас ээж, аав анхаарахгүй, хүүхдээ юу хийж байгааг ч мэдэхгүй байх үед сэтгэл эмзэглэдэг. Би өмнө нь ээж, аавтайгаа ярилцах гэж оролдож байсан. Гэхдээ ярилцаж байгаагүй. Би одоо эмээтэйгээ амьдардаг. Аав, ээж хоёр маань тусдаа байдаг болохоор уулзаж чаддаггүй юм. Энэ л их хэцүү санагддаг" гэсэн байгаа юм. Эндээс гэр бүлийн орчин нөхцөл, уур амьсгал хүүхдийн сэтгэл зүйд асар хүчтэй нөлөөлдөг нь харагдаж байна.  Өөрөөр хэлбэл хүүхэдтэйгээ үе тэнгийн юм шиг ойр дотно харилцан ярилцдаг байх нь чухал аж. 

Үе тэнгийн дээрэлхэлд асар их хор хохиролтой асуудал. Тухайлбал,  дээрэлхэлтийн цаана гэмт хэрэг, зөрчлийн шинж үүсэж  хуулийн байгууллага шийдвэрлэх, эргээд хүүхдүүдэд ял, хариуцлагын асуудал яригдаж эхэлдэг. Ийм  учраас  байх л зүйл гэсэн байдлаар хандаж огт болохгүй гэдгийг сэтгэл судлаачид, мэргэжилтнүүд хэлж байна. Нөгөө талаар эцэг, эх, асран хамгаалагч нарын хүлээх хариуцлагыг чангатгасан хууль ирэх есдүгээр сараас эхлэн хэрэгжинэ. Тодруулбал,  Хүүхэд хамгааллын тухай хуулийн шинэчилсэн найруулгаар эцэг эх, асран хамгаалагч нар хүүхдээ  гэмт хэрэг, зөрчил, дээрэлхэлд өртсөн  талаар  мэдсэн даруйд  холбогдох байгууллага,  албан тушаалтанд  мэдэгдэх,   хүчирхийлэл, дээрэлхлийн талаар мэдээлснээс хүүхдийн  аюулгүй байдлыг  хангах,   түүнд сэтгэл зүйн үйлчилгээ  үзүүлэх асуудлыг эцэг эх, асран хамгаалагч болон   боловсролын байгууллагад үүрэг болгосон  юм.

Эх сурвалж: Монголын мэдээ сонин #ҮзэлБодол #Дугаарын60мөр

2024 оны дөрөвдүгээр сарын 23. Мягмар. №040 (5958)