Т.Эрдмаа

Нэг үеэ бодоход нийтийн тээвэр шинэ автобустай болж  сайхан л байна. Гэвч нийтийн тээврийн талаарх иргэдийн хэл ам тасрахгүй үргэлжилсээр. Зарим чиглэлд цөөн тооны автобус явж буй тул нэмэх асуудал яригдах болов. Үүнээс гадна автобусны  нэг цэгээс нөгөө цэгт хүрч эргэх хурд, цаг хугацааг сайтар тооцоогүй асуудал гарч байгаа аж. Иймд нэг чиглэлийн автобус хоёр гурваараа цувраад хоосон давхилдаж байна. Гэтэл дараагийн автобусыг нь иргэд 30 минутаас нэг цаг хүлээх нь энүүхэнд болж.

Ингээд иргэдийн цахим хуудастаа автобусны үйлчилгээний талаар ямар санал гомдол гаргасныг дор өгүүлье. Жишээ нь  “Нэг чиглэлийн автобуснууд зарим нэг нь цувж ирээд хүнгүй явж байна.  Дараагийн автобус нь мөд ирдэггүй. Энэ автобус хоорондох зайг зохицуулж болдоггүй юм байх даа.  Шар хад- 3, 4 дүгээр хороолол гэдэг чиглэл ойрд бүр олдохоо байлаа шүү...

ТЭЦ-4,  Зунжин гээд 73 номерын автобусаа өглөө ажил цуглах үеэр нэмээд явуулмаар байна. Нэг талдаа ганц хоёр л автобус явах юм. Гэтэл өдөр ачаалал бага цагаар хоосон шахуу олноороо явж байгаа харагдах юм. Өглөө ажилдаа ирэх үеэр автобус ирэхгүй, орой тарах үеэр мөн автобус ирэхгүй бараг л таарсан автобусандаа арай гэж чихэж орно. Дээрээс нь хоёр, гурван цаг түгжирнэ. Ер нь л  зам дээр амьдарч байна даа... “ гэжээ. Үүнээс гадна автобусны жолооч нарын талаар гомдол санал бишгүй дээ л гардаг. Дүүрэн зорчигчтой явж байхдаа тамхи татлаа гэдэг асуудал харьцангуй гайгүй болсон сайшаалтай. Гэвч хүнээ гүйцэт суулгалгүй хөдөлдөг, автобусны хаалгаа гүйцэд хаалгүй хөдөлгөөн эхэлдэг, огцом тоормосолдог зэрэг асуудал гарсаар. Үүнээс шалтгаалж бэртэж гэмтсэн, хохирсон иргэн маш олон байдаг юм билээ. Олон хүний амь нас, эрүүл мэндийг хариуцан тээвэр хийж байж уг асуудалд анхаарах нь автобусны жолоочийн үндсэн үүрэг баймаар.

Тодруулбал, хэдхэн хоногийн өмнө Тээврийн прокурорын газраас "Нийслэлийн зорчигч тээврийн нэгтгэл" ОНӨААТҮГ-ын жолооч Б нь нийтийн тээврийн хэрэгсэл жолоодон замын хөдөлгөөнд оролцох үедээ анхаарал болгоомжгүй оролцож, зорчигчийн эрүүл мэндэд хөнгөн хохирол учруулсан,  “Эрдэм транс” ХХК-ийн жолооч Г нь нийтийн тээврийн хэрэгсэл жолоодон замын хөдөлгөөнд оролцох үедээ хаалга гүйцэд хаагдаагүй байхад хөдөлгөөнийг эхлүүлсний улмаас зорчигчийн эрүүл мэндэд хүндэвтэр хохирол учруулсан гэх хэргүүдтэй холбоотойгоор  зорчигчийн аюулгүй байдлыг хангаж ажиллах талаар тухайн аж ахуйн нэгж байгууллагын удирдлагуудад  тухайн зөрчлийг арилгах мэдэгдэл, үүрэг даалгавар өгчээ.

Иргэд орой 20 цагаас хойш автобусанд сууна гэдэг нь бөөн хүлээлт, алаан болж байна. Учир нь автобусны жолооч нар буух цаг дөхөж буй  тул албаар удаан 20 км цагийн хурдтай ар араасаа цувраад мөлхдөг болоод удлаа. Үүнийг автобусны архаг жолооч нар “цаг алах” гэдэг юм билээ. Ийм дүр зургийг Таван шар, Хайлааст, Долоон буудал, 120, Үйлдвэр комбинатын зам дээр орой бүр харж болно. Яг л уртаа гэгчийн вагон хөдөлж ядах аятай л харагдах юм. Ингэж явахдаа гэрлэн дохион дээр утсаа маажаад сууж байгаад нэг ногоон гэрлэн дохио өнгөрөөх нь энүүхэнд. Таван шар, Офицеруудын ордон чиглэлийн  зарим нэг автобус нь бүр 20 цаг дөнгөж өнгөрч байхад Таван шар, Даргоны гэрлэн дохиотой уулзвар дөнгөж нэвтрээд Тээврийн цагдаагийн постны арын зогсоол руу ороод зогсдог болж. Тэгээд үлдсэн зорчигчоо энд буугаарай. Буух цагаа хүлээж байна” хэмээн жишим ч үгүй хэлэх юм. Тэр  ажлын “цаг алаад” мөлхөж буй автобуснуудын жолооч замын хөдөлгөөнд ачаалал үүсгэж түгжрэлд хувь нэмрээ оруулж буйг анхаарах байгууллага байна уу. Тэд энэ үйлдлээ замын түгжрэлээс боллоо гэж  удирдлагууддаа тайлбарладаг юм гэсэн. Ажлын “цаг алдаг” ийм жолооч нараас шалтгаалж замын ачаалал оройдоо нэмэгдэхээс гадна тухайн чиглэлийн автобусыг хүлээн зогсох олон хүн бий шүү дээ. Одоо ч урин дулаан цаг ирсэн учраас автобус хүлээхээс залхсан иргэд алхаад явж болж байна. Гэхдээ цаг агаар таагүй бороо, салхи шуургатай үед яах билээ. За тэгээд өвөл бол бүр хэцүү гэдгийг хэн хүнгүй л мэдэх хойно олон үг хэрэггүй биз.

Эх сурвалж: Монголын мэдээ сонин #ҮзэлБодол #Дугаарын60мөр

2024 оны тавдугаар сарын 22. Лхагва. №052 (5970)