Электрон тоглоомын CS2-ын төрлийн энэ жилийн сүүлийн хамгийн том тэмцээн болох "Perfect World Shanghai Major 2024" тэмцээний Ази, Номхон далайн урьдчилсан шат буюу "Asia-Pacific RMR" өнөөдөр эхэлнэ.

Шанхайн мажорт оролцох гурван эрхийн төлөө Ази, Номхон далайн шилдэг найман баг хүч үзэх тэмцээнд монголын "The MongolZ" баг оролцоно. Мөн монгол дасгалжуулагчтай Австралийн "FlyQuest", монгол тоглогчоор хүчээ зузаатгасан Индонезын "Alter Ego" багууд багтаж байна.

Хятадын Шанхай хотод гурван өдөр үргэлжлэх тэмцээний эхний тоглолтThe MongolZ - Alter Ego 16:00 цагаас тоглох бол FlyQuest нутаг нэгт "TALON" багтай 19:00 цагаас тоглоно.

Нээлтийн тоглолтууд Bo1 журмаар бусад тоглолтууд Bo3 журмаар болно.

Манай багийн бүрэлдэхүүнд дасгалжуулагчаар Баянбатын Эрдэнэдалай /maaRaa/, багийн ахлагч Бямбасүрэнгийн Гарьдмагнай /bLitz/, Мөнхболдын Содбаяр /Techno4K/, Банзрагчийн Өсөхбаяр /910/, Батболдын Аюуш /mzinho/, Мөнхболдын Азбаяр /Senzu/ нар тоглоно.