БХИС-ийн түүхт 95 жилийн ойг тохиолдуулан тус сургуулийн сүлд дууг мөнхөлсөн хүндэтгэлийн хөшөөг босгосон билээ. Тиймээс  “Номын далай их сургууль” хэмээх БХИС-ийн сүлд дууны шүлгийг бичиж, олны хүртээл болгосон МУСТА, сэтгүүлч, яруу найрагч, бэлтгэлд байгаа дэд хурандаа Г.Баатарнумыг сониныхоо  редакцийн хойморт  урьж, цөөн хором ярилцлаа.

-Таны шүлгийг нь бичсэн БХИС-ийн сүлд дуу  хүндэтгэлийн хөшөөнд мөнхөрсөн байна билээ. Анх шүлгийг нь бичиж байсан тэр үеийн тань дурсамжаас ярилцлагаа эхэлье?

-“Номын далай их сургууль” дууны шүлгийг БХИС-ийн 75 жилийн ойг угтан зохиож байлаа. Тэр үед сургуулийн захиргаанаас ойг угтан, дууны шүлгийн тэмцээнийг зохион байгуулсан юм. Тэмцээнд надаас гадна хэд хэдэн уран бүтээлч  шүлгээ сойсон юм билээ. Миний  дуунд хоёр, гурван хөгжмийн зохиолч  ая хийсэн. Хамгийн анхны аяыг нь БХИС-ийн захиралаар ажиллаж байсан дэд хурандаа Ж.Дэндэв  хийж байв. Дараа нь МУАЖ П.Хаянхярваа мөн ая хийсэн юм. Нэг дуунд хэдэн ч хүн ая хийж болно шүү дээ. Харин тухайн үеийн тэмцээнд  П.Хаянхярваагийн аяыг нь зохиосон дуу нэгдүгээр байр эзэлж, БХИС-ийн сүлд дуугаар шалгарч байлаа. Түүнээс хойш БХИС-ийн үе үеийн төгсөгчид, оюутан залуус дуулсаар ирсэн. Үндсэндээ сүлд дуу болсноос хойш 20 гаруй жилийг үдсэн байна. Харин саяхан манай сургууль 95 жилийнхээ ойг тэмдэглэсэн. Ойн хүрээнд албан ёсоор сүлд дуу гэдгийг нь баталгаажуулж, хүндэтгэлийн хөшөөнд мөнхөлсөн юм. Хөшөөний нээлт энэ сарын 14-нд  БХИС дээр болж, МУАЖ П.Хаянхярваа, тус сургуулийн удирдлага, үе үеийн төгсөгчид нь оролцсон.  Миний урын санд 200 орчим дуу бий. Тэр дундаас анхны дуу маань  хөшөөнд мөнхөрсөнд  баяртай байгаа.

-Таны урын сан дахь   шүлэгнээс  сүлд дуу болсон  нь хэчнээн байгаа вэ?

-Ерөнхийдөө миний тооцсоноор  10 орчим сүлд дуу байдаг  юм билээ. Хамгийн анхных нь “Номын далай их сургууль”.  Дараа нь 2003 онд Ирак руу монгол цэргүүд мордох үед УГЗ, хөгжмийн зохиолч Т.Насанбуянтай хамтарч “Энхийн үйлсэд монгол цэргүүд” дуугаа хийсэн. Тэр дуу минь энхийг сахиулагчдын албан ёсны сүлд дуу болсон төдийгүй тун удахгүй хөшөө нь сүндэрлэх  байх. Энхийг сахиулагч монгол цэргүүдийн сүр жавхаа, баатарлаг үйлсийг алдаршуулсан дурсгалын цогцолбор байгуулах гэж буй. Тэнд дууны минь хөшөө босох юм билээ.  Түүнчлэн, Баянзүрх дүүргийн сүүлд дууг Д.Баттөмөр бид хоёр хамтран хийж байв. Одоо  тэр бүр дуулагдаад байдаггүй ч,  албан ёсны сүлд дуу нь болж баталгаажиж байсан удаатай. Үүнээс гадна Жанчивлангийн рашаан сувилалын сүлд дуу “Сүүн рашаан”, Багахангай дүүргийн сүлд дууг ч мөн бичсэн.

-Дуучны сонголтыг хэрхэн хийв?

-Хөгжмийн зохиолчид  сонгосон байгаа. “Номын далай их сургууль” дууг О.Хүрэлбаатар  Цэргийн дуу, бүжгийн эрдмийн чуулгын  гоцлол дуучнаар ажиллах байхдаа анх дуулж байлаа. Харин  энэ онд БХИС-ийн 95 жилийн ойгоор дуундаа шинэ клип хийсэн.  Энэ удаа  Цэргийн дуу, бүжгийн эрдмийн чуулгын  гоцлол дуучин, СТА Б.Батбаатар дуулсан. “Авралын бурхан их буу” дууг ч О.Хүрэлбаатар дуулсан байгаа. Клип нь одоо ч надад байдаг юм. “Энхийн үйлсэд монгол цэргүүд” дууг хамгийн анх ЦДБЭЧ-д байсан  Ц.Түвшинтөгс  дуулсан. Дараа нь Г.Жаргалсайхан, Б.Батбаатар нар дуулсан байдаг юм. Ер нь олон дуучин дуулсан. Энгийн сургуулийн оюутнууд ч дуулж байдаг.  Хөгжмийн зохиолч Т.Насанбуян “Орь залуу нас” “Нисгэгчийн дуу”, “Мичид шүргэх алтай” гэх мэт нийтэд түгсэн олон сайхан дууг зохиосон шүү дээ. Гэхдээ анх удаагаа марш зохиосон нь “Энхийн үйлсэд монгол цэргүүд” байсан юм билээ. Ер нь зөвхөн энхийг сахиулагчид бус, цэргийнхний заавал сурах 10 дууны жагсаалтад энэ дуу багтсан байдаг.

-Таныг  энхийг сахиулах ажиллагаанд үүрэг гүйцэтгэж байсан гэж сонссон юм байна?

-2004-2005 онд “Иракийн эрх чөлөө” олон улсын ажиллагааны гуравдугаар ээлжээр Иракт цэргийн сэтгүүлчээр долоон сар үүрэг гүйцэтгэж билээ. Тэнд байхдаа “Иракт өнгөрүүлсэн 190 хоног", “Иракаас бичсэн тэмдэглэл”-ээ бичсэн.  Хоёулаа ном болсон. “Иракт өнгөрүүлсэн 190 хоног" найраглал маань баримтат кино болсон байгаа. Иракийн тухай баримтат киноноос гадна “Галын дунд” гэсэн уран сайхны киноны зохиолыг ч бичсэн. Гэхдээ хөрөнгө, мөнгөний асуудлаас болоод зохиол нь хавтсан дотроо л  хэвтэж байна.

-Цэргийнхний заавал сурах 10 дуунд таны хэдэн бүтээл багтсан байдаг вэ?

-Хоёр  ч дуу бий. “Энхийн үйлсэд монгол цэргүүд”, “Дарийн утаа үнэрлэсэн дайчин жагсаал” гэж дуу байгаа. Энэ хоёр дуу заавал сурах 10 дуунд багтсан байдаг.
 

-Уран бүтээл нь хөшөөнд мөнхөрнө гэдэг тухайн зохиолчийн хувьд хамгийн том баярт үйл явдал байдаг байх?

-Тэгэлгүй яах вэ. Их сайхан байдаг юм байна. Би энэ талаар огт мэдээгүй байсан юм. Саяхан гадаадад явж байтал “Таны дуу хөшөө болох гэж байна. Аравдугаар сарын 10-нд хөшөөний нээлт болно” гэдгийг утсаар дуулгасан юм. Тэр үед нь би Монголд байхгүй байж таарсан. Гэтэл  нээлтийг нь хойшлуулж, энэ сарын 14-нд товлосон байсан. Өөрийн уран бүтээл хөшөөнд мөнхрөхөд  үгээр илэрхийлшгүй сайхан сэтгэгдэл төрдөг юм билээ.  2001 онд хөгжмийн зохиолч Т.Насанбуянгийн “Нисгэгчийн дуу”-ны хөшөөний нээлт болж, бид  оролцож байсан юм. Тухайн үед Т.Насанбуян “Би амьддаа хөшөөгөө босгосон хүн” гээд л даналзаж билээ. Тэр үед надад жаахан сонин санагдаж байсан юм. Гэтэл амьд сэрүүн ахуйдаа уран бүтээл нь хөшөөнд мөнхрөхийг харах үнэхээр сайхан байдаг юм байна. Хэдий би сэтгүүлч ч гэлээ, тэр сэтгэгдлээ үгээр илэрхийлж чадахгүй нь.  Дууны  хөшөөний хэлбэр нь ч их сайхан болсон.