Хөвсгөл аймгийн Тосонцэнгэл сумын Гандандамчойлон хийдийн хосгүй үнэт олдворуудыг энэ сарын 12-13-нд шилжих шөнө хулгайлагдсаныг Эрүүгийн цагдаагийн алба хаагчид шуурхай эрэн сурвалжилж, гэмт этгээдүүдийг баривчилсан талаар бид өмнө нь мэдээлсэн.

Тэгвэл Хөвсгөл аймаг дахь Цагдаагийн газар, Орхон аймаг дахь Цагдаагийн газар, МБГ-ын Онц хүнд гэмт хэрэг мөрдөх хэлтсийн алба хаагчид хамтран уг олдворуудыг Гандандамчойлин хийдэд өчигдөр хүлээлгэн өгсөн байна.

Тодруулбал, 300 жилийн настай хосгүй үнэт олдвор болох Хар морь сахиус, Жигжид бурхны хот мандал гэж нэрлэгдэх зурмал бурхан, Авид бурханы эртний зурмал хөрөг, хоёр жижиг арслан, 20 ширхэг шавар тогтоц бүхий бурханыг Ганданчойлон хийдийн хамба нарт хүлээлгэн өгчээ.

Дашрамд дурьдахад, уг хар морь хөлөглөсөн сахиусыг 1700 оны үед Ахай бээсийн хошууны ноён Төв дархан гүн Төвдийн хөх нуураас залж авчирч байжээ.