УДЭТ-ын 85,  Их зохиолч Д.Нацагдоржийн мэндэлсний 110  жилийн ойд зориулан бүтээж буй “Жаргаагүй нар” түүхэн эмгэнэлт жүжгийн нээлт ирэх сарын 4-нд болох гэж байна.  “Жаргаагүй нар” жүжгийн зохиолыг МУСГЗ Ш.Гүрбазар бичсэн бол  ерөнхий продюсероор  УГЗ Д.Цэрэнсамбуу ажилласан бол Ч.Түвшин найруулсан юм. 

Тэгвэл жүжгийн гол дүрд Б.Шинэбаяр /Д.Нацагдорж/,  Н.Баярмаа /Пагмадулам/ нар тоглож байна. Жүжгийн тасалбарыг УДЭТ-ын билетийн кассаар худалдаалж байгаа бөгөөд 10-50 мянган төгрөгийн үнэтэй байгаа ажээ.  “Жаргаагүй нар” тайзны уран бүтээлийн нээлт, тоглолтын үеэр үзэгчиддээ их зохиолчийн амьдрал, уран бүтээл хийгээд түүнийг кино урлаг, дүрслэх урлагт хэрхэн мөнхжүүлсэн талаарх эх сурвалж бүхий “МОНГОЛ АРДЫН СУУТ” гэрэл зургийн үзэсгэлэнг дэлгэн үзүүлэх юм байна.

“Жаргаагүй нар” жүжиг дуутай бөгөөд удахгүй клип нь гарах юм байна.  Дууны шүлгийг МУСГЗ, Д.Нацагдоржийн шагналт зохиолч Ш.Гүрбазар,  Дууны хөгжмийг МУУГЗ Хөгжмийн зохиолч Б.Бямбабаяр зохиосон аж. Харин дууг  ҮДБЭЧуулгын уртын дууч Х.Эрдэнэцэцэг, Asianshop хамтлагын дуучин Р.Батболд, Д.Бат-Ундрах, залуу дуучин Э.Номинчимэг, Поп Увертюра хамтлаг хамтран дуулсан байна.

Дашрамд дурьдахад, шинэ цагийн Монголын утга зохиолыг үндэслэгч, соён гийгүүлэгч, төр нийгмийн зүтгэлтэн Д.Нацагдоржийн амьдрал уран бүтээлээс сэдэвлэсэн “Жаргаагүй нар” жүжиг нь их зохиолчийн тухай өгүүлсэн бодит туурвилын анхны жүжиг юм.

Богд хаант Монгол, Барон Унгерны Монгол, Хувьсгалт Монгол гээд тусгаар тогтнолоо эрж тэмцсэн 5  засаглалын үед Д.Нацагдоржийн тухай өгүүлэх эл жүжиг нь  зохиолчийн бодит амьдралаас сэдэвлэн бүтээгдсэн түүхэн өгүүлэмж,  бодол эргэцүүлэлийн уран бүтээл аж.

31-хэн  насыг насласан хэдий ч сэтгэл оюундаа байсан хязгааргүй их суу билэгт оюуны  гайхамшигт их өв сангаа ирээдүй хойчдоо өвлүүлсэн өгсөн түүнийг өнөө цагт бахархан мөнхжүүлэхэд энэхүү жүжгийн гол агуулга оршжээ.