Чөлөөт, сонгомол бөхийн 2025 оны Азийн АШТ Йорданы нийслэл Амман хотноо дөрөв дэх өдрөө үргэлжилж байна.Тэмцээний эхний хоёр өдөр сонгомол бөхийн медальтнууд тодорсон бол өчигдөр эмэгтэй таван жингийн барилдаан болж Монгол Улсаас таван жинд таван бөх өрсөлдөж Б.Мөнхнар (50 кг), Б.Отгонтуяа (55 кг), Э.Дэлгэрмаа (68 кг) нар хүрэл медаль хүртсэн билээ.

Тэгвэл өнөөдөр эмэгтэй үлдсэн таван жингийн хэсгийн барилдаан болж байна. Эмэгтэйчүүдийн 65 кг-д Монголын бөх Түвшинжаргалын Энхжин аваргын алтан медалийн төлөө барилдахаар шалгарлаа.Тэрбээр хагас шигшээд Узбекистаны Шахзода Алланязоваг даралтаар цэвэр ялсан юм. Барилдааны явцад Т.Энхжин 4:0-ээр тэргүүлж яваад даралтад оруулан ялалт байгуулсан. Алтан медалийн төлөө Японы бөх, ДАШТ-ий алт, мөнгө, хүрэл медальт Мива Морикавагийн эсрэг барилдах юм.

Харин эмэгтэйчүүдийн 53 кг-ын хагас шигшээд шалгараад байсан Ч.Отгонтуяа БНАСАУ-ын бөх, “Парис-2024” олимпын хүрэл медальт Чо Хю Гёны эсрэг барилдлаа. Энэ барилдаан манай бөх крест мэхэнд дараалж оноо алдсаар 10:0-ээр ялагдав. Одоо Ч.Отгонтуяа хүрэл медалийн төлөө Казахстаны бөх, өсвөр, залуучуудын Азийн АШТ-ий мөнгө, хүрэл медальт Зеинеп Байановагийн эсрэг барилдах болно.

Харин эмэгтэйчүүдийн 57 кг-ын Х.Болортуяа хүрэл медалийн төлөө барилдана. Тэрбээр эхний тойрогт Вьетнамын бөх Ти Нга Дуонгтой барилдаж 8-1 харьцаагаар ялж, улмаар шөвгийн наймд Японы бөх Сара Натамид 0-11 харьцаагаар ялагджээ. Улмаар Японы бөх аваргын төлөө гарч ирсэн бөгөөд манай бөх дагаж хүрэл медалийн төлөө БНХАУ-ын бөх Кексин Хонгтой барилдахаар боллоо.

Харин эмэгтэйчүүдийн 72 кг-ын З.Болортунгалаг хүрэл медалийн төлөө барилдана. Тэрбээр эхний тойрогт БНХАУ-ын бөх Юки Люд 4-6 харьцаагаар ялагдаж улмаар Хятадын бөх алтан медалийн төлөө барилдахаар болсноор манай бөх хүрэл медалийн төлөө барилдах эрхтэй болжээ. Түүний өрсөлдөгч нь Узбекстаны бөх Светлана Окназароватай барилдана.

Медалийн төлөөх барилдаанууд орой 23:00 цагаас эхлэх юм. 

Гэрэл зургийг Д.Нямбилэг (Монголын спортын сэтгүүлчдийн холбоо)