УИХ-ын чуулганы өнөөдрийн /2025.06.03/ нэгдсэн хуралдаанаар Ерөнхий сайдын 2025 оны 5-р сарын 28-ны өдөр УИХ-д оруулсан Итгэл үзүүлэх тогтоолын төслийг хэлэлцэж эхэллээ.

Тус хуралдаанаар УИХ-ын гишүүн М.Нарантуяа- Нара өөрийн байр сууриа илэрхийлсэн байна. Тэрбээр "Энэ танхимд одоо байхгүй гишүүдийг сайн хараарай. Тэр хүмүүс бол аль талд нь орохоо мэдэхгүй, ялсных нь талд орно гэсэн алцганасан хүмүүс гэж хэлж болно. Би энд орж ирсэндээ харамсаж байна.

Энэ танхим бол Монгол Улсаа тонон дээрэмдсэн, мафи бүлэглэлийн эрх ашиг болсон бидний хандивын мөнгөөр орж ирдэг ийм л газар юм байна. Би өдөртөө олдог инфлүүнсерийнхээ цалинг сард хоёр хувааж авч байж хулгайч нарын нэг гэж дуудуулаад явж байна. Миний ажигласнаар Монголын ард түмэн болон энд орж ирсэн хүмүүсийг 3 хувааж болж байна.

Эрх ашгийн талд үхэн хатан үйлчилдэг ард түмэн болоод УИХ-ын гишүүд. Юу ч мэдэхгүй эргэлзэж, тээнэлзэж байгаа ард түмэн болоод УИХ-ын гишүүд, Засаг төр тогтвортой байгаасай гэсэн иргэд болон УИХ-ын гишүүд. Ийм л 3 төрөлд хуваагдаж байна. Та бүхэн нэг цүнх хараад л гайхаад байх юм. Энэ танхимд Шанель-ийн цүнхгүй гуйлгачин хэн байгаа юм бэ? Улаанбаатар хотын А бүсэд байгаа өндөр үнэтэй, тансаг байр, хотхон хорооллууд хэнийх юм бэ? Та нарынх биш үү! Хөдөө орон нутагт нэг гайгүй зочид буудал байдаг.

Энэ манай энэ тэр сайд, даргынх гэж хэлдэг. МАН-ынхаан, өнгөрсөн хугацаанд та нар дангаараа засаглаж ирсэн. Та нар ард түмний бүх боломжийг урдуур нь орж хулгайлсан. Хөгжлийн сан, ЖДҮ, концесс, тендер бүгдийг хувааж идсэн. Өнөөдөр хэн чинь Боловсролын сайд, Соёлын сайд, Байгаль орчны сайд болох гээд Ажлын албаа явуулж байгаа нь илт байгаа шүү дээ. Юу болж байгааг ард түмэн мэдэхгүй байгаа тул би үүнийг хэлж байна.