-Ардын багш, Академич А.Мекейн нэрэмжит Өлгий сумын 6-р сургуулийн шинэ байр ашиглалтад ороход бэлэн болсон ч албан тушаалтны шийдвэрээс үүдэн цоожтой хэвээр байна-

Монгол Улсын тооны ухааны салбарын томоохон төлөөлөл, нэрт математикч, Ардын багш, Академич А.Мекейн нэрэмжит Баян-Өлгий аймгийн Өлгий сумын ЕБ-ын 6 дугаар сургуулийн шинэ барилгын ажил бүрэн дууссан хэдий ч төрийн байгууллагуудын уялдаа холбоогүй шийдвэр, албан тушаалтнуудын зөрчилдөөнөөс шалтгаалан ашиглалтад орж чадахгүй нөхцөл байдал үүсээд байна. Үүний уршгаар улсын төсвийн 10.8 тэрбум төгрөгийн хөрөнгө оруулалт үнэгүйдэж, ирээдүйн математикчдыг бэлтгэх ёстой 1000 орчим багш, сурагчийн эрх ашиг ноцтой зөрчигдсөөр байна.

29 жил "айлын хаяа"-нд хичээллэсэн сургууль

Өлгий сумын ЕБ-ын 6 дугаар сургууль нь 1997 онд байгуулагдсан цагаас хойш өнөөг хүртэл Өлгий сумын 3 дугаар сургуулийн нэг жигүүрт хичээллэж иржээ. Одоогоор тус сургууль 821 сурагч, 57 багш, 42 ажилтантай бөгөөд дотуур байранд 165 хүүхэд амьдарч байна.

Харамсалтай нь нэрт эрдэмтний нэрэмжит тус сургууль өөрийн гэсэн спорт заал, номын сан, багш хөгжлийн танхимгүйгээс гадна мэргэжлийн тоноглогдсон кабинетгүй зэрэг хязгаарлагдмал нөхцөлд сургалтын үйл ажиллагаагаа 29 дэх жилдээ явуулж байна.

УИХ-ын гишүүн асан Д.Муратын “ЭРЧИНБАЯН-ӨЛГИЙ” ХК-ийн балаг

1. Анхны барилгын ажил эхэлсэн газар шороог булж төрийн өмчийн сургуулийн барилгын ажлыг зогсоосон.
2. Өлгий хотын ерөнхий төлөвлөгөөг, Усны тухай хуулийг зөрчиж, усны төв станцын эрүүл ахуйн хамгаалалтын бүс дотор зөвшөөрөлгүй газарт зуух барьсан.

Аймаг, сумдын засаг дарга нарын балаг

1. Зөвшөөрөлгүй газар барилгын ажил явуулж эхэлсэн үйл ажиллагааг таслан зогсоохоор тухайн үеийн аймгийн Засаг дарга А.Гылымханд сургуулийн зүгээс хандсан боловч үл тоомсорлон хариу арга хэмжээ аваагүй орхигдуулсан болно.
2. Тухайн үеийн Өлгий сумын засаг дарга байсан Ө.Бахытхумар нь Газрын тухай хуулийн 21.4.3, 33.1.1, 50.1 заалтуудыг, Хот байгуулалтын тухай хуулийн 22.1, 24.1.2, 24.1.5 дугаар заалтуудыг, Усны тухай хуулийн 22.4 дэх заалтуудыг тус тус зөрчиж хууль бус газар олгосон ба энэ талаар МХГ-ын улсын байцаагчийн 2020 оны 04-04-029/34, 04 дүгээр сарын 29-ний өдрийн Э/311 албан шаардлагыг биелүүлээгүй.

ГХБХБГ-ын албан тушаалтнуудын балаг

Зөвшөөрөлгүй газар барилгын ажил явуулж эхэлсэн үйл ажиллагааг таслан зогсоохоор тухайн үеийн аймгийн ГХБХБГ-ын дарга К.Болат-д сургуулийн зүгээс хандсан боловч үл тоомсорлон хариу арга хэмжээ аваагүй орхигдуулсан, Тус байгууллагын хэлтсийн дарга нар ажилдаа хайнга хандаж зөрчлийг таслан зогсоох арга хэмжээ аваагүй мөртлөө сургуулийн барилга ашиглалтад өгөгдөх мөчид хууль журам ярьж төрийн албыг завхруулж байна. Тухайн үед бодит шаардлага тавьж ажилласан бол өнөөдрийн мухардалд орохгүй байсан.

“КӨШЕЛИК” ХХК-ийн захирал Х.Мүптийн балаг

Тавьсан шаардлагыг биелүүлээгүйгээр зогсохгүй зөвшөөрөлгүй газар барилгын ажил эхлүүлсэн. “ЭРЧИМ БАЯН” ХХК-ийн дохиогоор хөдөлсөн.

Сургуулийн 640 суудалтай шинэ барилгын ажил 2019 онд эхэлсэн ч удааширсаар 8 дахь жилдээ үргэлжилж байна. Барилгын ажил 2025 оны 11 дүгээр сарын 11-ний өдөр бүрэн дуусаж, сургууль нүүж ороход бэлэн болсон. Сургуулийн барилгын гадна дулаан, цэвэр, бохир усны шугам сүлжээг татаж, халаалтын зуухыг барьж дуусган, халаалтаа өгөөд байгаа юм.

Гэтэл ГХБХБГ-ын хэлтсийн дарга Х.Асхар тус сургуулийн халаалтын зуухыг эрүүл ахуйн хамгаалалтын бүсэд зөвшөөрөлгүй баригдсан гэх үндэслэлээр хууль хяналтын байгууллагад ханджээ. Саяхан Дээд шатны прокуророос Х.Асхарын гаргасан гомдлын дагуу хэрэг нээж шалгах шаардлагатай гэсэн хариу ирүүлснээр сургуулийг ашиглалтад оруулах ажил таг гацлаа.

Хэрэв сургуулийг төвлөрсөн дулаанд холбохоор хүлээвэл энэ жил байтугай ойрын хэдэн жилдээ ашиглалтад орохгүй байх эрсдэлтэй байна.

Хууль зөрчсөн газар олголт ба төлөвлөлтийн алдаа

Энэхүү маргаантай нөхцөл байдал үүсэх болсон үндсэн шалтгаан нь анхнаасаа хууль тогтоомж зөрчсөн шийдвэрүүдтэй холбоотой аж.

Газрын маргаан: Анх Өлгий сумын Засаг даргын 2018 оны А/145 дугаар захирамжаар "Хуттымекен" хороололд сургуулийн газар олгогдож, 2019 онд газар шорооны ажил эхэлсэн. Гэвч 2020 оны 3-р сард УИХ-ын гишүүн асан Д.Мурат 3ЭРЧИМБАЯН-ӨЛГИЙ” компанийнхаа машин трактороор булж, уг ажлыг зогсоосон байна.

Өлгий сумын засаг дарга асан Х.Бахытхумар 2020 оны 3-р сарын 17-нд А\76 дугаар захирамжаар байршлыг өөрчлөн одоогийн баригдсан газарт барилгын ажлыг эхлүүлжээ.

Зөвшөөрөлгүй эхлэл: Барилгын ажил эхлэхэд МХГ-ын байгаль орчны байцаагчид болон "СУАТ" компанийн ерөнхий инженер техникийн нөхцөлд гарын үсэг зураагүй байсан нь 2014 онд батлагдсан Өлгий хотын Ерөнхий төлөвлөгөө болон Усны төв станцын эрүүл ахуйн хамгаалалтын бүсийн дэглэмийг зөрчихөд хүргэсэн байна.

Захирамжийн будлиан: Өлгий сумын тухайн үеийн Засаг дарга газар олгох захирамжаа (А/76) цуцалж (А/96), дахин олгож (А/121), буцаан цуцалж, эцэст нь А/321 захирамжаар одоогийн газрыг олгох зэргээр ойлгомжгүй, тогтворгүй шийдвэрүүд гаргаж байжээ.

Төрийн албан тушаалтнууд ажилдаа хайнга хандаж, хөндлөнгийн нөлөөнд автан хууль бус шийдвэр гаргасны золиос нь өнөөдөр хүүхдүүд болж байна. Иймд холбогдох дээд шатны байгууллагууд энэ асуудалд онцгой анхаарал хандуулж, Ардын багш, Академич А.Мекейн нэрэмжит 6 дугаар сургуулийн барилгыг яаралтай ашиглалтад оруулахыг багш, сурагчид болон эцэг эхчүүд шаардаж байна.