Монгол Улсын Ерөнхий сайд Г.Занданшатар, нийслэлийн Засаг дарга бөгөөд Улаанбаатар хотын Захирагч Х.Нямбаатар нар ДЦС-5 төслийн талбайд ажиллалаа.

Дулааны тавдугаар цахилгаан станц нь 340 Гкал дулаан, 300 МВт цахилгаан үйлдвэрлэх суурилагдсан хүчин чадалтай бөгөөд Баянгол дүүргийн 20 дугаар хорооны нутаг дэвсгэрт ДЦС-2-ын үнсэн сангийн талбайд барина. Төр хувийн хэвшлийн түншлэлээр хэрэгжүүлэх тус төслийн гүйцэтгэгч "Митайм Интернэйшнл" компанитай нийслэлийн Засаг дарга бөгөөд Улаанбаатар хотын Захирагч Х.Нямбаатар өнгөрөгч оны аравдугаар сард гэрээнд гарын үсэг зурсан билээ.

Төслийн талбайд ажиллах үеэр Монгол Улсын Ерөнхий сайд Г.Занданшатар “Улс орны аюулгүй байдлын асуудал учраас эрчим хүчний станцын төслүүдээ үр ашигтай хэрэгжүүлэх ёстой. Өмнө нь Шивээ-Овоо, Багануур, ТЭЦ-5-ын төслүүд гацаж байсан. Бид шинэ үүсвэрүүдийг барихдаа дулааны тооцооллоо сайн хийж, өмнөх гашуун туршлагуудаа давтахгүй байхад анхаарах нь зөв юм. Дулааны тооцоолол, чадал, шугам сүлжээнийхээ ачааллыг тооцож байж үр ашигтай хувилбарыг сонгох хэрэгтэй” гэв.

Нийслэлийн Засаг дарга бөгөөд Улаанбаатар хотын Захирагч Х.Нямбаатар “Бид ДЦС-2-ын үнсэн санг нийслэл орчмын ухагдсан карьерууд руу зөөх ажлыг хоёрдугаар сарын 15-аас эхлүүлэхээр бэлтгэл хангаж байна. Ийнхүү 65 жил хуримтлагдсан үнсийг зөөж, барилга угсралтын ажлыг дөрөвдүгээр сарын 21-ээс эхлүүлнэ. Долоодугаар сарын 22-нд зуухны угсралтын ажил эхэлнэ. Станцын үндсэн тоноглолууд болох турбин, генератор, зуухаа захиалсан. Арванхоёрдугаар сарын 21 гэхэд турбин, генераторын угсралт эхэлнэ. Ирэх оны арваннэгдүгээр сарын 15-нд зуух, турбины туршилтаа эхлүүлж, 2028 оны хоёр болон тавдугаар сард нэг, хоёрдугаар блокийг ашиглалтад оруулахаар төлөвлөөд байна. ДЦС-5-ын хамгийн том ач холбогдол нь Улаанбаатар хотын баруун хойд хэсгийг орон сууцжуулахад цахилгаан, дулааны томоохон эх үүсвэр болох юм. Мөн бид эрчим хүчний тархмал эх үүсвэрийн төслүүд дээр тендер зарлахаар бэлтгэж байна” хэмээн онцлов.

Дулааны тавдугаар цахилгаан станц нь 2х150 МВт хүчин чадал бүхий хоёр блоктой байна. Агаар мандалд хаягдах утааны хийд агуулагдах NOx, SO₂-ыг хянах хяналтын системтэй эргэлтэд буцлах үет шаталттай CFB технологитой зуух ашиглана. Уг станцыг усны хэрэглээг бууруулсан агаарын хөргөлттэй конденсатортай, хаягдал усаа эргүүлэн ашиглах байгаль орчинд ээлтэй шийдлээр барих юм. Төсөл хэрэгжиж эхэлснээр жилд 2.2 тэрбум кВт.цаг цахилгаан эрчим хүч үйлдвэрлэнэ. Бүрэн хүчин чадлаараа ажилласан үед жилд дулааны ачаалал 4.8 сая ГДж байхаар ТЭЗҮ-ээр тооцоологдсон. Цахилгаан үйлдвэрлэлийн 90 хувийг төвийн сүлжээнд нийлүүлж, үлдсэн 10 хувийг станцын дотоод хэрэглээнд зарцуулна.

Төсөл хэрэгжсэнээр Улаанбаатар хотын өсөн нэмэгдэж буй цахилгаан, дулааны хэрэглээг бие даасан, найдвартай эх үүсвэрээр ханган, төвийн эрчим хүчний системийн ачааллыг бууруулж, дотоодын үйлдвэрлэлийн өсөлтөд эерэг нөлөө үзүүлэх, ажлын байрыг нэмэгдүүлэх, улс орны эдийн засгийн тогтвортой өсөлтийг хангахад хувь нэмэр оруулна. Улмаар эрчим хүчний дэд бүтцийг сайжруулж, цахилгаан түгээх, дамжуулах байгууламжуудыг шинэчлэх, эрчим хүчний хангамжийг найдвартай болгох, цахилгаан дамжуулах шугамын хүчин чадлыг нэмэгдүүлэхийн зэрэгцээ орчин үеийн ухаалаг эрчим хүчний технологийг нэвтрүүлснээр Монгол Улсын эрчим хүчний салбарт технологийн шинэчлэлийг хурдасгах, цэвэр эрчим хүчний хөгжлийг дэмжих юм.