Үерийн 51 дуудлага иржээ
Нийслэлийн Онцгой байдлын газарт өчигдөр айл өрх, гудамж талбай усанд автсан, байшин, зоорийн давхар руу ус орсон 51 удаагийн дуудлага иржээ. Тухайлбал, Сүхбаатар дүүргийн 13 дугаар хорооны Ногооны талбайн 4-7 дугаар гудамж, Рашаантын 7-12 дугаар гудамж үерт автсан байна. Үерийн үеэр Онцгой байдлын албанаас 40 хүн, дүүргийн албадаас 34 хүн, таван механизм, есөн автомашин, гурван мотопомптойгоор шуурхай арга хэмжээ авч ажиллажээ.
Аврагчид айл өрхүүдийн гэр, байшин, хашаанд тогтсон үерийн усыг мотопомп ашиглан соруулах, далан, суваг шуудууг ус чөлөөтэй урсах нөхцөл боломжоор ханган үерт автсан айл өрхийн аюулгүй байдлыг хангасан аж. Нийт дуудлагын 92.3 хувийг үерийн аюултай бүсэд суурьшсан айл өрхийн хашаа хороонд ус орсон дуудлага эзэлж байна.
Цаг агаарын урьдчилсан мэдээгээр Улаанбаатар хотод сарын гуравдугаар арав хоногийн ихэнх хугацаанд түр зуурын дуу цахилгаантай бороо орж, бороо орох үеэр салхи зарим газраар түр зуур 12-14м/с, зарим үед 16-18 м/с хүрч ширүүсч болзошгүй болохыг Нийслэлийн Онцгой байдлын газраас сэрэмжлүүллээ.
Тиймээс иргэд үер усны аюулаас урьдчилан сэргийлэх сэрэмжлүүлэг, мэдээ, дохиог хэвлэл мэдээллийн хэрэгсэл, мэдээллийн бусад эх сурвалжаас тогтмол хүлээн авч сэрэмжлэх, бусдад дамжуулах, хүүхдийг хараа хяналтгүйгээр гол мөрөн, нуур, цөөрмийн орчимд тоглуулахгүй, орхихгүй байх, үерийн аюулаас эрүүл мэнд, амь нас, эд хөрөнгөө аврах, хамгаалах, гэр хашаагаа тойруулж суваг шуудуу татах, бэхэлгээ хийх, хүүхэд, жирэмсэн эх, өндөр настан, хөгжлийн бэрхшээлтэй хүмүүсийг аюулгүй газар байлгахыг анхааруулж байна.
МЭДЭЭНИЙ СЭТГЭГДЭЛ
ХОЛБООТОЙ МЭДЭЭ
Веб сайтад агуулагдсан мэдээлэл зохиогчийн эрхийн хуулиар хамгаалагдсан тул зөвшөөрөлгүй хуулбарлах хориотой.
Copyright © MMINFO.MN All Rights Reserved. Powered by HUREEMEDIA.
