Их хэмжээний цас орсны улмаас орон нутгийн замд хальтиргаа, гулгаа ихээр үүссэн. Үүнээс  болж орон нутгийн замд гарах осол нэмэгдэж байгаа аж. Өнгөрсөн шөнө гэхэд Сэлэнгэ аймгийн Баянгол сумын нутагт хот, хоорондын зорчигч тээврийн хэрэгсэл онхолдсон байна.

Тодруулбал, Сэлэнгэ аймгийн Баян II дугаар баг “Хустайн даваа” орчимд Истана маркийн автомашин замын хажуу руу онхолджээ. Ослын улмаас нэг иргэн хүнд, 16 иргэн, хоёр хүүхэд хөнгөн гэмтжээ. Тус хэргийг шалгалтын ажиллагаа үргэлжилж байгааг Цагдаагийн газраас мэдээллээ.

Мөн хот, хооронд зорчихдоо баталгаатай тээврийн хэрэгслээр үйлчлүүлэхийг анхааруулсан юм. Түүнчлэн холын замд явахдаа анхаарал, болгоомжтой байж, хурд хэтрүүлэхгүй байхыг жолооч нарт санууллаа.