Засгийн газрын “Чөлөөлье” Үндэсний санаачилгын хүрээнд Улаанбаатар хотын худалдааны танхим, хувийн хэвшлийнхэн Сүхбаатар дүүргийн 11 дүгээр хороо, 32-ын тойргийн нэгдсэн авто зогсоолд цахилгаан тээврийн хэрэгсэл цэнэглэх "Ногоон өртөө"-г өнөөдөр ашиглалтад орууллаа.  

Энэхүү "Ногоон өртөө" нь хамгийн олон буюу 15 автомашин нэгэн зэрэг цэнэглэх хүчин чадалтай. Хүчдэлийн сонголтын хувьд хамгийн бага хугацаанд 5-30 минутад цэнэглэх чадалтай юм. Мөн шөнийн хөнгөлөлттэй тарифтай. Тус өртөөг ААНОАТ-ын тухай хуулийн дагуу татварын орлогын 1 хувь хүртэлх хэмжээний хандив, хөрөнгө оруулалтаар нийгмийн хариуцлагын хүрээнд байгуулжээ.

Ерөнхий сайд Н.Учрал нээлтийн үеэр хэлсэн үгэндээ, ""Ногоон өртөө"-г төсвийн хөрөнгөөр барих ёсгүй. Татварын нэг хувийг шинэ эдийн засаг, дэд бүтцэд хөрөнгө оруулахаар хуульчилна. Тоног төхөөрөмжийг нь гааль, НӨАТ-аас чөлөөлнө. Өртөөдийн үйл ажиллагааг хэвийн явуулах нь хувийн хэвшлээс шалтгаалах учраас төр зөвхөн бодитой хийгээд бодлогын дэмжлэг үзүүлнэ. Хэдэн цахилгаан цэнэглэгч тавьсан газар Ерөнхий сайд очлоо гэж шүүмжлүүлж байгаа. Гэхдээ би илүү олон удаа очно. Зөв, шинэ зүйлийг эхлүүлэхийн тулд Засгийн газар өөрийн биеэр очиж дэмжинэ. Монголын төр хэлсэндээ хүрдэг байх ёстой. Төр, хувийн хэвшлийн хамтын ойлголцол, зөвшилцөл дор Монгол Улсаа ногоон өртөөгөөр сүлжье" хэмээлээ. 

"Улаанбаатар хотын Худалдааны танхим"-ын Гүйцэтгэх захирал Б.Хаш-Эрдэнэ, 32-ын тойрог дахь энэхүү "Ногоон өртөө" ашиглалтад орсноор нийтийн тээвэрт цахилгаан автобус нэвтрүүлэх боломж бүрдэж байна гэлээ. Том оврын автомашин цахилгаан цэнэглэлтээр 100 км зам туулахад 6,470 төгрөг, жилдээ 1.2 сая төгрөг зарцуулдаг байна. Энэ нь автобензин машинтай харьцуулахад 3-5 дахин бага зардал аж.

Засгийн газар “Ногоон чөлөөлөлт"-ийн хүрээнд аж ахуйн нэгжүүдийг бодлогоор дэмжиж, Монгол орны зам дагуу 150 километр тутамд 1 "Ногоон өртөө" байгуулж, улс орон даяар 500 түргэн цэнэглэх станцын сүлжээ бий болгох зорилт тавин ажиллаж байна. Үр дүнд нь жил бүр түлшний импортод зарцуулдаг 200 сая гаруй ам.долларын гадагшлах мөнгөн урсгал, 166 мянган тонн хүлэмжийн хийн ялгарал бууруулах боломж бүрдэх юм. Дээрх хэмжээний хүлэмжийн хийн ялгарлыг бууруулах нь ойролцоогоор 33 мянган янданг буулгасантай дүйцэхүйц үзүүлэлт болно.