УИХ-ын ээлжит бус чуулган өнөөдөр эхэлнэ. Засгийн газраас өргөн мэдүүлсэн улсын нэгдсэн төсвийн 2026 оны төсвийн хүрээний мэдэгдэл, 2027-2028 оны төсвийн төсөөллийн тухай хуульд өөрчлөлт оруулах тухай хуулийн төсөл, мөн 2026 оны төсвийн тухай хууль, Үндэсний баялгийн сангийн 2026 оны төсвийн тухай хууль, Нийгмийн даатгалын сангийн 2026 оны төсвийн тухай хууль, Эрүүл мэндийн даатгалын сангийн 2026 оны төсвийн тухай хууль зэрэг хуулиудад өөрчлөлт оруулах тухай хуулийн төслүүдийг хэлэлцэнэ.

 

Ээлжит бус чуулган 14-нийг хүртэл үргэлжлээд 15-нд намрын ээлжит чуулганыг нээнэ. Тус чуулганаар хэлэлцэх асуудал хэдийнэ тодорхой болсон. Гэхдээ хаврын чуулган хаахаас өмнө яригдаж байсан ерөнхий хяналтын сонсголын тоо намрын чуулганаар нэмэгдэж магадгүй байна. Тодруулбал, УИХ-ын Төрийн байгуулалтын байнгын хорооны 2026 оны долдугаар сарын 1-ний хуралдаанаар “2026 оны намрын ээлжит чуулганы хугацаанд хэрэгжүүлэх төлөвлөгөөт хяналт шалгалтын цаглавар”-ыг батлахад “Ерөнхий хяналтын хоёр сонсголд зохион байгуулна” гэж байсан юм. Тэгвэл энэ “тоо” одоогоор дөрөв болох мэдээлэл байна. Ямартай ч УИХ-ын гишүүн Ж.Баярмаа, Д.Ганбат тэргүүтэй гишүүдийн санаачилсан Гашуунсухайт-Ганцмод боомтын хил холболтын төмөр зам болон нүүрс худалдах урт хугацаат гэрээг буюу олон нийтийн нэрлэж заншсанаар “Харбины гэрээ”-г шалгах, нээлттэй сонсгол хийх тухай юм. Улмаар, уг асуудлаар УИХ-ын түр хороо байгуулахыг 2025 оны арванхоёрдугаар сарын 9-нд Эдийн засгийн байнгын хорооны хуралдаанаар дэмжсэн. Угтаа энэ нь АН-аас санаачилсан сонсгол юм. Харин МАН, тэр дундаа 30-ын бүлгээс нь энэ намрын чуулганаар гурван ч сонсголыг санаачилж явуулахаар болжээ. Нэг дэх нь БОХХААБХ-ноос энэ сарын 28, 29-нд “Хүнс, хөдөө аж ахуй, хөнгөн үйлдвэрийн салбарт 2008 оноос хойших хугацаанд төрөөс олгож байгаа дэмжлэг, урамшуулал, Засгийн газраас хариуцан төлж байгаа зээлийн хүүгийн татаас олголтын байдал, хэрэгжилт’’ сэдвээр сонсгол хийх гэж байна. Хоёр дахь нь, Монгол Улсын төрийн өндөр албан тушаалтнууд Жеффри Эпштейнтэй холбоотой байж Оюу толгойн гэрээ, Монгол Улсын сонгуулиудад нөлөөлсөн эсэх, хүүхэд эмэгтэйчүүдийн эрхийг ноцтой зөрчсөн эсэхээр “Эпштейний файл”-ыг судалж, гадаад улс орнууд, тэдгээрийн холбогдох байгууллагатай хамтран үүнийг тодорхой болгох зорилгоор сонсгол хийхээр болсон байна. Гурав дахь нь, өдгөө АН-ын Ерөнхий нарийн бичгийн даргаар ажиллаж байгаа Сангийн сайд асан С.Баярцогтын хэрэг дээр шүүгч нар яагаад тусгай санал гаргаж, прокурорууд тэр дагуу нь сулласан тухай бичиг баримтуудад нотлон шинжлэх сонсгол хийх санаачилгыг бас гаргажээ. Тэд “Шүүгчийн тусгай санал, прокурорын саналаар С.Баярцогтыг цагаатгасан нь улс төрийн нөлөөтэй байж болзошгүй ба хүн бүр хуулийн өмнө эрх тэгш байх Үндсэн хуулийг зөрчсөн” гэж үзэж байгаа юм байна. Өөрөөр хэлбэл, намрын чуулганаар МАН-ын 30-ын бүлгээс гурав, АН-аас нэг “анхаарал татсан” сонсголыг хийж магадгүй байна.

 

 

 

Эх сурвалж: “Зууны мэдээ” сонин

 

2026 ОНЫ ЕСДҮГЭЭР САРЫН 7. ДАВАА ГАРАГ. № 167 (7909)

 

 

 

Хуурамч мэдээлэл хаа сайгүй тархах болсон энэ үед баримттай, эх сурвалжтай, үнэн бодитой мэдээллийг “Зууны мэдээ” сониноос аваарай.

 

Үнэн мэдээллийг хамтдаа хамгаалцгаая.

 

Бие даасан сэтгүүл зүйг дэмжин "Зууны мэдээ" захиалаарай. www.zuuniimedee.mn