АНУ-ын Холливудад өчигдөр найм дахь удаагийн “Governors Awards” шагнал гардуулах ёслолын үйл ажиллагаа зохион байгуулагдаж, Хонконгийн жүжигчин 62 настай Жэки Чан “Оскар”-ын хүндэт шагналын хүртлээ.

Инээдмийн, адал явдалт уран сайхны киноны нэртэй жүжигчдийн нэг болох Жэки Чан 1960 оноос хойш жүжигчний гараагаа эхэлснээс хойш 200 гаруй бүтээлд дүр бүтээжээ. Түүнчлэн, 1996 онд түүний гол дүрд нь тоглосон “Rumble in the Bronx” кино Холливудад хит болж байсан юм. Түүнээс хойш “Оргил цаг”, “Каратэ хүү”, “Кунг Фу панда” зэрэг уран бүтээлээрээ дэлхий дахинаа танигдсан билээ.

Улмаар жүжигчний хичээл зүтгэл, кино урлагт оруулсан хувь нэмрийг үнэлж, АНУ-ын кино академиас Оскарын хүндэт шагналыг олгохоор болсон юм.

Оскарын шагналыг хүртэх мөчдөө тэрбээр  “Кино урлагийн салбарт 56 жил зүтгэхдээ 200 гаруй уран бүтээлд тогложээ. Олон ч удаа гэмтэж бэртэж байлаа. Эцсийн эцэст энэ шагнал минийх боллоо” хэмээн баярласан сэтгэлээ илэрхийлсэн байна.