Монголын загварын ертөнцийн хамгийн том наадам болох “Гоёл-2017”-ын сүүлчийн шатны шалгаруулалт арванхоёрдугаар сарын  1-нд  болох гэнэ. Монголын дизайнеруудын холбооноос 29 дэх жилдээ зохион байгуулах гэж буй “Гоёл” наадамд манай улсад үйл ажиллагаа явуулж буй хувцас загварын агентлаг, салон, үйлдвэрүүд “Шилдэг дизайнер”, “Шилдэг загвар”, “Шилдэг зохион бүтээх товчоо” зэрэг номинацид бүтээлээ өрсөлдүүлэх юм.

Харин өнгөрсөн жилийн топ моделиар Х.Уянга шалгарч байсан бол шилдэг эмэгтэй загвар өмсөгчөөр дизайнеруудын холбооны загвар өмсөгч А.Хулан шалгарчээ. Мөн тус тэмцээний гранпри шагналыг “Шилмэл загвар” ХХК-ийн дизайнер Д.Өнөболор, шилдэг загвар зохион бүтээх товчоогоор Үндэсний үйлдвэрлэгч “Говь” ХХК авч байсан.

Ирэх жилийн загварын өнгө төрхийг тодорхойлдог тус наадмын үндсэн тов хараахан гараагүй байгаа гэнэ. Дашрамд сонирхуулахад, өнгөрсөн жилээс эхлэн  “Гоёл” наадам загварын долоо хоногоор үзэгчидтэй уулздаг болсон билээ.