Хэдхэн хоног цас ороход л нийслэлийн зам цасандаа дарагдаж, хальтиргаа гулгаа үүсч, автомашинууд элгээрээ мөлхөж эхлэв. Яг энэ бичлэгийг уншиж байхад нийслэлийн хэмжээнд ойролцоогоор 40 мянга гаруй тээврийн хэрэгсэл замын хөдөлгөөнд оролцож, түгжрэл дунд саатан яваа.

 

Түгжрэл толгойны өвчин болж ядаж байхад дарь нь дээр давс гэгчээр хэдэн өдөр дараалан цас орчихов. За ингээд л гудамжаар нэг түгжрэлээс болж бухимдсан иргэд. Энэ байдал ч цаашид үргэлжлэх нь. Улсын онцгой комисс өнгөрсөн лхагва гарагт хуралдах үеэр Ус цаг уур, орчны шинжилгээний газрын дарга С.Энхтүвшин цаг агаарын нөхцөл байдлын талаархи хатуухан мэдээ дуулгасан.

 

Тодруулбал, өнөөдрөөс эхлээд энэ сарыг дуустал сүүлийн 10 гаруй жилд ажиглагдаагүй онцгой цочир хүйтрэлт болох гэнэ. Энэ нь хойд туйлын хүйтэн агаар Сибирийн хойд хэсгээс Монголын баруун хойд хэсэг рүү орж ирснээс Сибирийн их даралтын орон хүчтэй эрчимжин, 17-25-ныг хүртэлх хугацаанд манай орны нутаг дээр байрлахтай холбоотой аж.

Цочир хүйтрэлээс болж цасан болон шороон шуурга шуурч, зам даваа хаагдаж, харагдац муудаж, хальтиргаа гулгаа нэмэгдэж, хээр гадаа байх тохиолдолд хөлдөж осгож болзошгүйг анхааруулсан. Цаг агаарын таагүй нөхцөл байдал түгжрэл гэх толгойны өвчинг нэлээд хүндрүүлэх нь байна. Хүндрүүлнэ гэдэг нь их хотын машины түгжрэл амралтын өдрүүдэд ч үргэлжилнэ гэсэн үг. 

 

Нэгэнт л байгалийн үзэгдлийг зогсоож чадахгүйгээс хойш эрхзүйн зохицуулалтаараа машиныхаа түгжрэлийг багасгах арга хэмжээ авбал ямар вэ. Одоогийн бадлаар нийслэлийн хэмжээнд түгжрэлийг багасгах чиглэлээр хэрэгжиж буй ажил гэвэл автомашины дугаарын хязгаарлалт. Товчхондоо гэвэл ажлын таван өдөрт л автомашины дугаарын хязгаарлалт үйлчилж байна. Харин амралтын өдрүүдэд энэ журам хэрэгждэггүй. Уг журам амралтын өдөр хэрэгждэггүйгээс болж иргэд сард наймхан удаа олддог амралтын өдрөөрөө гэр бүл, найз нөхөдтэйгээ агаар салхинд гарч, хоол хүнсээ бэлдэх гэхээр дахиад л түгжрэл дунд үйлээ үзэж яваа нь үнэн.

 

Тэртээ тэргүй томоохон баяр ёслолын үеэр замын хөдөлгөөний ачааллыг бууруулах зорилгоор тээврийн хэрэгслийг амралтын өдөр ч улсын дугаараар нь замын хөдөлгөөнд оролцуулах шийдвэр гаргадаг. Тэгвэл энэ шийдвэрээ дахиад хэрэгжүүлье. Нэгэнт л цас их орж, хальтиргаа гулгаа үүсэхийг холбогдох байгууллагаас анхааруулж байгаа юм чинь автомашиныхаа түгжрэлийг ингээд зохицуулж болохгүй гэх нөхцөлгүй. 

 

Ингэх нь амралтын өдөр түгжрэлийг тодорхой хэмжээгээр багасгахаас гадна хальтиргаанаас үүдэлтэй автотээврийн ослыг ч бууруулна. Нэг л жишээ дурьдахад, өнгөрсөн мягмар гарагт гэхэд л хоёр ч автобусны жолооч явган зорчигчийг мөргөж, гэмтээсэн. Энэ нь бас л нөгөөх хальтиргаа гулгаатай холбоотой. Нөгөөтэйгүүр хэрэв амралтын өдөр дугаарын хязгаарлалт хийчихвэл ядаж очих газраа хүртлээ нэг цаг түгжрэх байсан бол энэ хугацаа багасах боломжтой. Тиймээс амралтын өдрүүдэд дугаарын хязгаарлалт хийе.