Нийслэлийн мэргэжлийн хяналтын газраас энэ сарын 17-нд нийслэлийн хэмжээнд эмнэлгийн үйл ажиллагаа явуулдаг аж ахуйн нэгжүүдэд шалгалт хийсэн байна.

Шалгалтын үеэр шарх угааж, гадуур хэрэглэх зориулалттай уусмалыг өвчтний судсаар хийж байсан ноцтой зөрчлийг илрүүлжээ.

Тодруулбал, Баянгол дүүргийн III дугаар хороо, “Грейс” төвийн хоёр давхарт эмнэлгийн үйл ажиллагаа явуулж буй эмнэлгийн эмч нар шарх угаах, гадуур хэрэглэх зориулалтай гурван хувийн 1 мл уусмалыг /перкис/ хордлого тайлах, шингэн сэлбэх зориулалттай 0.9 хувийн 250 мл натрийн хлоридын уусмалтай хольж, найруулан өвчтнүүдийн биед венийн судсаар хийж байсан аж.

Мөн тус газарт бага эмч мэргэжилтэй Ц эмнэлгийн тусламж үйлчилгээ явуулах, мэргэжлийн үйл ажиллагаа эрхлэх тусгай зөвшөөрөлгүйгээр эмнэлгийн тусламж үйлчилгээ, бариа засал, соронзон резонанс аппаратын оношлогоо хийж байсныг илрүүлсэн байна. Шалгалтын хүрээнд дээрх эмнэлгийг улсын ахлах байцаагчийн актаар үйлчилгээг нь зогсоожээ. Харин  зөрчил гаргасан бага эмч Ц-д “Эрүүл мэндийн тухай хууль”-ийн холбогдох заалтын дагуу захиргааны арга хэмжээ авчээ.