Хөдөлмөр, нийгмийн хамгааллын яам  Хүчирхийллийн эсрэг үндэсний төвтэй хамтран “Жендэрт суурилсан хүчирхийлэлтэй тэмцэх 16 хоногийн аян”-ыг өчигдрөөс эхлүүллээ. “Жендэрт суурилсан хүчирхийлэлтэй тэмцэх 16 хоногийн аян”-ыг дэлхийн 180 гаруй улс орон ижил цаг хугацаанд, нэгдмэл зорилго, нийтлэг уриан дор нэгэн зэрэг зохион байгуулдаг бөгөөд энэ жил дэлхий даяараа “Гэр орны амар амгалангаас дэлхийн энх тайван руу: Бүх нийтэд боловсролыг хүртээмжтэй болгоё” уриан дор нэгдэх юм. Харин тус аяныг  манай улс “Хүчирхийлэлд үгүй гэж хэлье!” хэмээх уриан дор тэмдэглэн өнгөрүүлэхээр болоод байна.

Тус аяныг Монгол Улсад 1998 оноос эхлэн жил бүр тогтмол зохион байгуулж ирсэн бөгөөд аяныг дэмжигч хувь хүн, төр, төрийн бус байгууллага, бүлгүүд зохион байгуулалттайгаар үйл ажиллагаагаараа нэгдэж, хөдөлгөөнийг өрнүүлэхэд дэмжлэг үзүүлэн ажиллаж байна. Энэхүү аян нь охид эмэгтэйчүүдийн эсрэг хүчирхийллийг хүний эрхийн ноцтой зөрчил мөн гэдгийг олон нийтэд ойлгуулах, тэдний дэмжлэгт тулгуурласан эерэг өөрчлөлт хөдөлгөөнийг бий болгоход чиглэдэг аж.

Монгол Улсад 1997 оноос эхлэн жил бүр тогтмол ирсэн бөгөөд аяныг дэмжигч хувь хүн, төр, төрийн бус байгууллага, бүлгүүд зохион байгуулалттайгаар үйл ажиллагаагаараа нэгдэж, хөдөлгөөнийг өрнүүлэхэд дэмжлэг үзүүлэн ажиллаж байгаа ажээ.  Тиймдээ ч уг аяны хүрээнд гэр бүлийн хүчирхийллийг онцолж, нөлөөллийн болон урьдчилан сэргийлэх үйл ажиллагааг чиглүүлэн ажилладаг байна.

Учир нь манай улсын хувьд 2010-2016 оны эхний 10  сарын байдлаар буюу 7 жилийн хугацаанд 94 хүн гэр бүлийн хүчирхийллийн улмаас амь насаа алдсан тоо баримт байгаа аж. Харин гэмтсэн хүний тоо 4363-д хүрчээ. 2015 онд Гэр бүлийн хүчирхийлэлтэй холбоотой 1356 гэмт хэрэг бүртгэгдэж, 24 нас барсан нь хамгийн өндөр тоо байна. Тэгвэл 2016 оны эхний 10 сарын байдлаар  1066 гэмт хэрэг бүртгэгдэж, 9 хүн нас барж, 956 хүн гэмтжээ. Гэхдээ энэ бол зөвхөн Цагдаагийн байгууллагад бүртгэгдсэн гэмт хэргийн тоо мэдээлэл. Тиймээс бүртгэгдээгүй гэр бүлийн хүчирхийлэл хэд байгааг хэлэхийн аргагүй юм.