Парламентын бүх нийтийн сонгуульд МАН-ын үнэмлэхүй ялалт байгуулснаас хойш төрийн зарим байгууллага аливаа шийдвэр гаргахын өмнө сошиал сүлжээгээр тандалт хийж,  дэмжигдсэн тохиолдолд хэрэгжүүлдэг тогтолцоо үйлчилж эхлэв. Өнөөдөр гэхэд л Засгийн газрын хэвлэл мэдээлэл олон нийттэй харилцах албаны дарга Г.Отгонбаяр өөрийн фэйсбүүк хуудсаараа дамжуулан иргэд шинэ жилээр хэд хоног амрах хүсэлтэй байгааг тандаж буй сурагтай. Тэрбээр “2017 оны нэгдүгээр сарын 01-ны өдөр амралтын өдөр буюу ням гаригт таарч байгаа аж. Бүх нийтээр амардаг энэ өдөр нэгэнт амралтын өдөр таарсан тул түүнийг 12-р сарын 30-ны ажлын өдөрт шилжүүлэн тооцож,  арванхоёрдугаар сарын 29-нөөс эхлэн нэгдүгээр сарын 1 хүртэл дөрвөн хоног амарвал ямар вэ”  гэсэн албан бус саналыг сошиал хуудастаа дэвшүүлж, хэр олон хүн дэмжиж буйг тандсан гэнэ.  Тиймээс түүний энэ санаа нийгмийн сүлжээнд дэмжигдвэл цаашдаа албан ёсоор хэлэлцэгдэж,  шийдвэр болон гарч ч магадгүй бололтой.

Арванхоёрдугаар сарын 29-нд Үндэсний эрх чөлөө, тусгаар тогтнолоо сэргээсний баярыг нийтээр тэмдэглэнэ. Зургаа дахь жилдээ тэмдэглэж буй энэ баяр өнөө жил  пүрэв гарагт тохиож буй бөгөөд  үндэсний эрх чөлөөний хөдөлгөөн өрнүүлж, Манжийн дарлалаас салж, Богд хаант Монгол Улсыг байгуулсны 105 жилийн ой тохиож байгаа юм.  Ийнхүү бүх нийтээр энэ сарын 29-нд амрах учир дунд нь ганцхан ажлын өдөр таарч байгаа нь 30-ны өдөр билээ. Өмнө нь Тусгаар тогтнолын баярын  амралтыг урагшлуулж, арваннэгдүгээр сарын 25-ны өдөр бүх нийтээр амрах шийдвэрийг Засгийн газраас гаргаж  байсан удаатай. Тиймээс энэ шинэ жилээр бүгдээрээ дөрвөн өдөр амарч магадгүй нь байна шүү.