Задарсан гишүүдэд Ц.Нямдорж шиг л дарга хэрэгтэй байж
УИХ-ын дэд дарга Ц.Нямдорж чуулганы өчигдрийн хуралдааныг даргалж, салхилгагүй гишүүдийг ёстой нэг дэгэнд нь оруулаад авлаа. Учир нь өчигдрийн хуралдаан өглөөний 10:00 цагт эхлэх байсан хэдий ч хэнэггүй гишүүд хуралдаа цагтаа ирээгүй юм. Харин хуралдааны цаг өнгөрөөд аль хэдийнэ хагас цаг болж байхад чуулганы танхимд дөнгөж 20 гишүүн цугларсан нь УИХ-ын дэд дарга Ц.Нямдоржийг ихэд бухимдахад хүргэсэн юм.
Тиймээс тэрбээр “Гишүүдийн туслахууд гэртээ унтаж байгаа гишүүдээ авчир” хэмээгээд хоосон танхимыг сонгогчдод харуулахыг шаардсан. Ингээд тэрбээр “Төрийн ажил гэдэг хариуцлагатай. Хуралдаа цагтаа ирж чадахгүй бол яах гэж сонгууль нэр дэвшсэн юм бэ” хэмээн гишүүдийг зэмлэж, хуралдаанд цагтаа ирээгүй гишүүдийн нэрсийг нэг бүрчлэн зарласан юм.
Үдээс хойших хуралдааны үеэр ч энэ байдал мөн давтагдаж, гишүүд 20 минут хоцорч хуралдаа ирсэн. Тус хуралдааны үеэр ч УИХ-ын дэд дарга Ц.Нямдорж ирц бүртгэн “Та нараас өнөөдөр салахгүй шүү. Ирцээ бүртгэнэ” хэмээн гишүүдийг сандаргасан.
Харин өглөөний хуралдааны үеэр хуралдаа ирээгүй гишүүдийн нэрсийг дуудахад инээлдэж байсан гишүүд үдээс хойших хуралдаан дуусахад “Маргаашийн хуралдаанд яг цагтаа ирж чадахгүй уу” хэмээх дэд даргынхаа асуултад дуулгавартай нь аргагүй нэгэн дуугаар “Чадна аа” хэмээн хариулснаар хурал тарсан.
Тэгвэл өнөөдөр өглөөний чуулганд гишүүд яг цагтаа цугларч, ёстой л нэг гишүүн шиг байна даа. Ямартай ч, Ц.Нямдоржийн зангарагтай байдал талаар өнгөрсөнгүй. Өндөр боловсролтой гэгддэг ч сахилга батгүй хэдэн гишүүнийхээ хөл толгойг олж, дэгэнд нь оруулчихлаа. Уг нь УИХ-ын чуулганы хуралдааныг ингэж л удирдмаар байгаа юм даа.
Гурав, дөрөвхөн настай цэцэрлэгийн багачууд хүртэл өглөө болгон ээлжит албандаа цагтаа очиж байхад насанд хүрсэн тэр дундаа улсын хамгийн чухал албыг хашч байгаа хүмүүсийн хөл жаахан хөнгөн баймаар юм. Дашрамд дурьдахад, УИХ-ын дарга М.Энхболд ч гэсэн дэд дарга Ц.Нямдоржоосоо хурал даргалах талаар суралцах л хэрэгтэй юм байна.
МЭДЭЭНИЙ СЭТГЭГДЭЛ
ХОЛБООТОЙ МЭДЭЭ
Веб сайтад агуулагдсан мэдээлэл зохиогчийн эрхийн хуулиар хамгаалагдсан тул зөвшөөрөлгүй хуулбарлах хориотой.
Copyright © MMINFO.MN All Rights Reserved. Powered by HUREEMEDIA.
