Төв аймгийн Сэргэлэн сумын нутаг, Хөшигийн хөндийд Олон улсын нисэх онгоцны буудал баригдаж байгаа билээ. Төлөвлөгөө ёсоор бол энэ нисэх буудал өдийд ашиглалтад орж байх ёстой. Учир нь өнгөрсөн жилийн тавдугаар сарын 23-нд тэр үед УИХ-ын дарга байсан З.Энхболд Хөшигийн хөндийн нисэх онгоцны буудлын ажилтай танилцсан. Тэр үед хэрвээ одоогийн хурдаараа ажиллавал 2016 оны арванхоёрдугаар сард дуусгана гэж гүй­цэтгэгчид нь ярьж байсан. Тэгэхээр юу юугүй ашиглалтад орох дөх­чих­сөн байсан гэсэн үг.

Өнөөх яриад байсан хурдаараа ажиллаагүй байлаа гэж бодоход ирэх оны эхний улиралд багтаад ашиглалтад орчих байлгүй дээ. Нөгөө талаар энэхүү нисэх онгоцны буудлыг дагасан жишиг хот ч байгуулагдана гээд байгаа. Ерөөсөө тэнд ажиллах хүмүүс амьдрахаас авахуулаад аятайхан суурин байгуулах хэрэгтэй болж таарна. Гэх мэтээр энэ онгоцны буудлын ач холбогдол дуусахгүй. Улаанбаатараас нэг ч болов айлыг гаргахад ч хэрэгтэй. Гэтэл өнөөх Олон улсын жишигт нийцсэн нисэх онгоцны буудал нь ашиглалтад орохоосоо л өмнө бөөн асуудал дагуулаад эхэллээ.

Нэг удаа галд өртсөн. Манайхан аливаа асуудлыг нэг их тоодоггүй болохоор галын дөл өөдөө гээд л өнгөрсөн. Харин саяхан буюу арванхоёрдугаар сарын эхээр Хөшигийн хөндийн нисэх онгоцны буудлыг барих туслан гүйцэтгэгч компанийн үйлчилгээний ажилчид хоолны хордлого авч, эмнэлэгт хүргэгдсэн.

Тодруулбал, “Чойнхор” гэх компанийн 27 ажилтан өдрийн хоолондоо бүрмэл шарсан тахианы мах идээд л хордлого авч, бүр 4, 5 нь ухаан алдаж, таталт өгөөд балрахаа алдсан. Тэгвэл тус компанийн ажилтан хэвлэлд торуулга өгөхдөө үдийн хоолондоо ороогүй хоцорсон хэсэг хүмүүст тахианы мөч өгсөн. Тэр нь шүүрхий байсан. Тахианы мах идсэн бүх хүмүүс хордсон хэмээн ярьсан байна билээ.

Энэ чинь одоо тэгээд дэлхийн жишигт нийцэж байгаа хэрэг үү. Дэлхийн жишигт нийцсэн юм хийх гэж байгаа бол барилгын шав тавихаас эхлээд л ашиглалтад ортол хариуцлагатай ажиллах ёстой. Ашиглалтад орсны дараа бол мэдээж дэлхийн жишгийг хүн бүр шаардана биз дээ. Тийм байтал өнөө маргаашгүй ашиглалтад орох дөхсөн Олон улсын нисэх онгоцны буудлын барилгыг барьж байсан ажилчид хоолондоо хордохоор яах болж байна аа.

Хөшигийн хөндийн онгоцны буудалд гал гарахад ч, хүмүүс хоолондоо хордоход хүртэл дэлхий дахин тэр болгоныг мэдэж л байгаа. Энэ бүхэн чинь Монгол Улсын нэр хүндээс татаж унагаад л байгаа хэрэг шүү дээ. Ядаж тахианы мөчөө болгочихож чадахаар тогооч ажиллуулах ёстой биз дээ. Тогоочийн буруу биш гэвэл чанар муутай, хугацаа нь дууссан хүнсний бүтээгдэхүүн авсан ч байж болох. Нэг газраа л алдаа гарсан. Угтаа бол энэ том газарт алдаа гаргах эрх байхгүй. Юун хоолны хордлого вэ.

Ийм байхад ашиглалтад орсны дараа нь их, бага хэмжээгээр нэр хүндэд нь нөлөөлөөд л явчихна. Тэнд хэдэн ресторан, зоогийн газар нээгдлээ гэхэд хүмүүс орж хоол идэхээсээ цэрвэх ч юм бил үү, хэн мэдлээ. Ялихгүй зүйлээс ямааны гарз гэж манайхан хэлдэг. Хуруугаа эсгээд амиа алдсан хүн ч байдаг л байх. Түүнтэй адил өнөөдрийн том, жижиг асуудлууд маргаашийн лай болох ч юм бил үү. Олон улсын хэмжээний ажил хийж байгаа бол олон улсдаа таалагдахаар, жишигт нь нийцэхээр л ажиллаач дээ. Ядаж л чанартай хүнсний бүтээгдэхүүн аваад, түүнийг амттайхан болгочих тогооч ажиллуулчих л даа.