Ардчиллын алтан хараацай С.Зоригийн амийг зэрлэгээр бүрэлгэсэн хэрэг 18 жилийн дараа нэг юм шүүхэд шилжсэн ч  ШШГЕГ-ын 461 дүгээр хорих ангид эхэлсэн анхны шүүх хурлаар арванхоёрдугаар сарын 21-нийг хүртэл хойшлуулсан. Тэгвэл дуулиант хэргийг шүүх хурал өчигдөр дахиад л хаалттай эхэллээ.

Учир нь хэрэгт маш нууц зэрэглэлтэй материал хавсрагдаж буй учраас олон нийтэд мэдэгдэж болохгүй, шүүх хурлын үеэр нууц мэдээлэл алдагдаж болзошгүй учраас бичлэг хийх хэрэгсэл, гар утсыг цагдаагийнхан хураан авсан юм. Эл хэрэгт сэжигтнээр татагдсан Ц.Амгаланбаатар, Б.Содномдаржаа, Т.Чимгээ нар шүүгдэж буй. Өнгөрсөн удаагийн шүүх хурлын дараа УИХ-ын гишүүн О.Баасанхүү Улсын Дээд Шүүхийн Ерөнхий шүүгч Ц.Зоригт хандан Шүүгдэгчдийн эрхийг хангуулах тухай албан тоот илгээж, шүүх хуралдааныг ШШГЕГ-ын харьяа хорих 461 дүгээр ангид хийж байгаа нь хууль зөрчиж байгаа тул дараагийн шүүх хурлыг зориулалтын шүүхийн байранд явуулж өгөхийг хүссэн ч шүүх хурлыг 461 дүгээр хорих ангид хийсэн. Шүүх хуралд Ерөнхий шүүгч М.Алдар даргалж, шүүгчээр Б.Мөнх-Эрдэнэ, С.Оюунчимэг нар оролцоно. Харин өмгөөлөгчөөр Л.Мөнхтөр, С.Оюунцэцэг, Д.Дашдорж, Л.Энхсайхан, улсын яллагчаар Б.Батжаргал, Ж.Сандагсүрэн нар оролцов.

Мөн шүүх хуралд хохирогчдын ар гэрийг төлөөлж Г.Чулуунбат гэрчээр оролцохоор болсон төдийгүй талийгаачийн гэргий Б.Булган ч гэрчээр оролцох тухай яригдаж байсан ч тэр ирээгүй юм. Харин шүүгдэгч Ц.Амгаланбаатарын ээж, Б.Содномдаржаагийн эгч шүүх хуралд оролцсон юм. Үүнээс гадна ОБЕГ-ын хоёр шинжээч оролцож байгаа талаар мэдээлсэн.

Өглөөний 10:00 цагт эхэлсэн шүүх хурал үргэлжилсээр, 12:30 цагийн орчимд шүүх бүрэлдэхүүн нууцтай холбоотой асуудлаар хуралдаад эргэн хурлыг үргэлжлүүлсэн юм. Түүнчлэн шүүх хуралдаан эхлэхээс өмнө эмч нар ирсэн бөгөөд өмгөөлөгч С.Оюунцэцэгийн даралт ихэссэн учраас үзлэг хийсэн гэж тайлбарласан. Үүнээс хойш шүүх хурал завсарлаагүй бөгөөд улсын яллагч Б.Батжаргал, Ж.Сандагсүрэн нар дөрвөн цагийн турш ялын дүгнэлтийг уншиж танилцуулсан байна.

Хэдийгээр өмгөөлөгч нар шүүх хурлыг хойшлуулах хүсэлт гаргасан ч шүүх бүрэлдэхүүн хүлээж аваагүй юм. Ингээд ялын дүгнэлтийг танилцуулсны дараа таван минут завсарлаад орсон. С.Зоригийг хөнөөсөн хэрэгт сэжигтнээр Ц.Амгаланбаатар, Б.Содномдаржаа, Т.Чимгээ нараас 17:45 цагийн үед мэдүүлэг авч байв. Сэжигтнүүд мэдүүлэг өгсний дараа шүүх хурал завсарласан юм. Хурлыг өнөөдөр Цагдан хорих 461 дүгээр ангид 10:00 цагт үргэлжлүүлэхээр болов. Дашрамд дурьдахад, Эрүүгийн байцаан шийтгэх хуулийн 234.2-т “Шүүх хуралдааныг өдрийн цагаар, амрах зайлшгүй шаардлагатайгаас бусад цагт тасралтгүй явуулна” гэж заасны дагуу шүүх хуралдааныг завсарлуулсан ажээ.