Холимог тулааны спортын хаан Конор Макгрегор 25 сая ам.долларын төлөө Флойд Мейвезертэй тулна. UFC буюу Ultimate Fighting Challenge холбооны босс Дэн Уайт холимог тулааны дэлхийн аварга Конор Макгрегор, мэргэжлийн боксын дэлхийн аварга асан Флойд Мейведер нарыг хоорондоо үзэлцвэл тус бүрд нь 25 сая ам.долларын шагнал өгөхөд бэлэн гэдгээ мэдэгдсэн. Гэхдээ ялсан ч, ялагдсан ч шагнал авах юм. Флойд Мейвезер ирэх тавдугаар сарын сүүлчээр 40 насны босго алхах бөгөөд  мэргэжлийн бокст өөрийн ул мөрөө тод томруун үлдээсэн домогт аваргын сүүлийн тулаан энэ байж магадгүй гэх таамаг бий.  

 

Нийт 49 тулаан хийхдээ ялагдах нь байтугай тэнцэж ч үзээгүй түүнийг бүх цаг үеийн хамгийн агуу боксчдын жагсаалтад оруулах нь гарцаагүй. Гэтэл холимог тулааны дэлхийн аварга Конор Макгрегор түүнийг халз тулаанд дуудсан нь дэлхий нийтийг шуугиулж орхисон. Хоёр өөр төрлөөр хичээллэдэг, тэс өөр арга барилтай, тус тусын холбоондоо үнэмлэхүй аварга гэгдсэн тулаанчид өөр хоорондоо үзэлцсэн түүх спортын ертөнцөд үгүй. Тиймээс ч олон нийтийн дунд энэхүү тулаан ихээхэн хүлээлт үүсгээд байгаа юм. Энэ утгаараа  бид өнөөдрийн дугаартаа Конор Макгрегорыг сонгон товчхон ярилцлагыг нь орчуулан уншигчиддаа сонирхуулахаар бэлдлээ. Гэхдээ тулааны талаар бус, Конор Макгрегор гэх хэн болох, зорилго, амьдралын хэв маягийнхаа  талаар дэлгэсэн сонирхолтой ярилцлагыг сонголоо. Дашрамд дурьдахад, тэрбээр ирэх тавдугаар сард анхны хүүхдээ өлгийдөн авах билээ. 

 

-Конор, та бага насныхаа тухай бидэнд яриач?

-Би Дублин хотын Крамлин дүүргийнх. Намайг 17 нас хүртэл манайх тэнд амьдарч байгаад Лукан руу нүүсэн. Гэхдээ Луканд яагаад ч юм тогтож өгөөгүй. 17 нас гэдэг тун эмзэг үе шүү дээ. Бүх найзууд маань Луканд байдаг учраас байнга л хуучин бокс, фитнесс заал руугаа явчихдаг байж билээ. 

 

-Тэгээд спортын ертөнцөд хөл тавья гэсэн хүсэл хэдийнээс төрж эхлэв?

-Тамирчин болох хүсэл үргэлж л миний сэтгэлд байсан. Бага байхдаа бусад хөвгүүдийн л адил хөлбөмбөгчин болохыг хүсдэг байлаа. Харин өсч том болохын хэрээр хөлбөмбөг сонирхлыг минь татахаа больж, харин өөрийгөө хэрхэн хамгаалахад суралцах хэрэгтэй болсон. 14, 15-тай л байсан байх. Тэр үеэс л тулааны спортоор хичээллэж, эцэстээ холимог тулааны спорт руу эргэлт буцалтгүй орсон доо. 

-Та спортод дурласан. Тийм ч учраас ажлаасаа хүртэл гарсан?

-Тийм ээ. Би гагнуурчин байсан. Мөрөөдлөө биелүүлж, холимог тулааны урлагт өөрийгөө бүрэн зориулахаар шийдэж, ажлаасаа хүртэл гарсан. Бусад залуусын адил барилгын талбай дээр өглөө эрт ирж, шөнө дөл хүртэл ажиллахыг хүсээгүй л дээ. Бүтээн байгуулалтын ажил хүнд. Надад тохирох ажил биш байсан. 

 

-Ажлаасаа гарах таны  шийдвэрийг ээж /Маргарет/, аав /Тони/ тань хэрхэн хүлээн авсан бэ?

-Тэд эхэндээ хүндээр хүлээж авч билээ.  Учир нь тэр үед сантехникийн ажил нэлээд эрэлттэй байв. Мэргэжлийн, туршлагатай гагнуурчин бол мөнгө сайн олдог байсан үе. Эцэг, эх маань ч намайг мэргэжлээ зөв сонгосон хэмээн их баяртай байдаг байлаа.  Ийм ажлаасаа гарна гэж хэлэхэд тэд тийм ч таатай хандаагүй. Гэхдээ цаг хугацаа өнгөрөхөд тэд намайг юунд бүхнээ зориулж буйг ойлгосон. Намайг шийдвэрээсээ буцахгүй, юунд ч бууж өгөхгүй гэдгийг тэд харсан. Тэгээд л эцсийн эцэст би ялж, тэд намайг бүрэн дүүрэн дэмжих болсон доо. 

 

-Харин одоо бол таниар бахархдаг байх?

-Мэдээж, тэгэлгүй яах вэ. Одоо бол тэд миний үнэнч шүтэн бишрэгчид шүү. Бүх л өдрийг онлайнаар  UFC, MMA-ын тулаан үзэж өнгөрүүлдэг. Тэднийг хараад би ч баяр хөөртэй болчихдог.

 

-Найз бүсгүй Ди тань ч бас өөрийн тань шүтэн бишрэгч байх. Өнөөдөр ч гэсэн та хоёр хамтдаа ирж зураг авалтад орсон. Ер нь анх та хоёр яаж танилцсан юм бэ?

-Өмнө нь би түүнийг зүс мэддэг байлаа. Харин анх удаа нэг шөнийн клубт олж хараад, ярилцаж байсан юм. Би түүн дээр түрүүлж очоод, зүгээр л чатлаж болох уу гэж асуусан. Тэр надад сайн бүсгүй шиг санагдсан. Ер нь надад хөөрхөн гэхээсээ илүүтэйгээр сайн бүсгүйчүүд таалагддаг. 

-Хүчирхэг эрийн ард хүчирхэг эмэгтэй байдаг гэх үг бий. Энэ үг та хоёрын харилцааны хувьд хэр үнэний ортой вэ, Конор?

-100 хувь. Тэмцээний рингэнд гарч эхэлснээс хойш өдөр бүр тэр намайг дэмждэг. Тэр л намайг фитнесс клуб руу жолоодож, миний бүхий л мөрөөдлийг сонсч, бас дэмждэг. Ди миний хувьд амьдралын минь аврагч. Хэрвээ тэр байгаагүй бол би юу ч хийж чадахгүй байх байсан. Түүний төлөө л бол бүхнийг хийнэ. 

 

-Найз бүсгүйтэйгээ хангалттай их цагийг өнгөрүүлж чадахгүй байгаадаа буруутай юм шиг санагдаж байсан үе бий юу?

-Бид ихэнх цагаа хамтдаа өнгөрүүлдэг. Тун дотно харилцаатай. Бүх зүйл сайн. Олон жилийн турш надтай хамт амьдарсан хүн шүү дээ. Мэдээж, заримдаа хэцүү үе тулгарч л байсан. Амьдрал угаасаа хэцүү. Гэхдээ эцсийн эцэст үнэ цэнэтэй байх л хэрэгтэй. 

 

-Яаж тэр вэ?

-Гэр бүлийнхээ ирээдүй, Дигийн ирээдүйг баталгаатай болгохын тулд л би тулалддаг. Хэзээ нэг өдөр,  Дитэй хамт дэлхийн аль нэг хэсэгт санаа зовних зүйлгүй, наран шарлагын газарт биеэ шарахыг хүсч байна. Үүний төлөө л би  явж байна. Хэзээ нэгэн цагт хүүхдүүдтэй болохдоо санхүүгийн эрх чөлөөнд хүрсэн байхыг хүсч байна. 

 

-Конор, өөрийгөө хэр романтик гэж боддог вэ?

-Мэдэхгүй. Магадгүй тийм ч романтик биш байх. 

 

-Яриаг тань сонсоход та бүхий л зүйлсийг найз бүсгүйнхээ төлөө хийдэг юм байна. Тийм ч учраас их романтик залуу байх нь гэж бодлоо?

-Өөртөө л романтик. Өөрийн эмэгтэйнхээ төлөө өөрийгөө зориулж байна.

- Ер нь гэмтэж, бэртэх вий гэж санаа зовдог уу?

-Юу ч тохиолдохгүй болохоор энэ тал дээр санаа зовдоггүй. Цохиж чадахгүй болох хүртлээ л тулалдана. Тийм болохоор таны асуусан шиг зүйл хэзээ ч миний ой ухаанд орж ирж байгаагүй. Харин өрсөлдөгч маань зүгээр байгаа даа гэж бусад хүмүүст л санаа зовдог. 

 

-Бие бялдарын сургуулилт амьдралын тань ихэнх хувийг эзэлдэг. Бидэнд биеэ хөгжүүлэх талаар зөвлөгөө өгөөч?

-Долоо хоногийн даваагаас баасан гараг хүртэл би өдөрт гурван удаа дасгал сургуулилт хийх дуртай. Бямба, нямд ч дасгалаа таслахгүй. Гэхдээ илүү хүйтэн чанарын усанд сэлж, гүйдэг. Өдөр бүр л дасгал хөдөлгөөн хийж байх хэрэгтэй. Тэгж байж л биеийн формоо барина шүү дээ. Үнэндээ, миний хувьд дасгал, сургуулилт хийхгүйгээр нэг өдөр ч байж чаддаггүй. 

 

-Зарим өглөө сургуулилтаа хийх хэрэгтэй байдаг, гэтэл өөр илүү чухал ямар нэг зүйл хийх хэрэгтэй мэт бодогдох үе  байдаг уу?

-Тийм. Заримдаа өглөө сэрээд, фитнес заал руу явахдаа өөрөө өөртэйгээ тэмцэлдэнэ шүү дээ. Гэхдээ бид тулаан, тэмцээний төлөө амьдардаг улс. Хэрэв би хийхгүй бол өөр хэн нэгэн надаас илүү гарчих учраас тэр.  Ингэж байж л хэн нэгэн хүнээс илүү байж чадна. 

 

-Хэн нэгэн өөрийг тань даган дуурайж, үлгэрлэх талаар бодож байв уу?

-Үгүй ээ, бодож байгаагүй. Хүмүүс намайг харвал, өөрийнхөө  хийж байгаагаа харуулж, түүнээсээ урамшдаг. Тэр л надад гайхалтай. Би залуу байна. Хэн нэгний үлгэр жишээ авах хүн болохыг хүсэхгүй байна. 

 

-Амжилт гаргахад юу шаардлагатай вэ?

-Нэгэнт л тулааны бизнест хөл тавьсан л бол өөрөө өөрийгөө сурталчлах шаардлагатай болдог. Ярьж, явж байж л хүмүүс чамайг сонирхоно. Хэрэв чамайг хүмүүс сонирхож байвал тулаанд ялах, эсвэл ялагдахыг чинь харах гэж мөнгө төлдөг юм. UFC-ын тулааныг хэр олон хүн сонирхож үзэж байна, төдий чинээгээр  их мөнгө халаасална гэсэн үг. 

 

-Мухаммад Али Дублиных. Харин дараагийнх нь таныг гэж Райн Тюбриди хэлсэн байж билээ. Энэ талаар таны бодлыг сонирхмоор байна?

-Мухаммад Али бол домог. Би түүнийг харж, түүн шиг болохыг мөрөөдөж өссөн. Тэр бас их хөгжилтэй, загварлаг эрхэм байж билээ. Райн ингэж хэлсэнд үнэхээр баяртай байна. 

 

-Таны загварын хэв маяг Крис Юбенкийг санагдуулдаг. Өмнө нь өөр хүн танд ингэж хэлж байсан уу?

-Та л анх удаа хэлж байна. 

 

-Эцэст нь, Конор. Чи дэлхийн хаана ч байж болно. Гэхдээ Ирландыг хэзээ ч битгий мартаарай?

-Хэзээ ч мартахгүй. Би Ирландых. Хаашаа ч явахгүй.